बीजिंग: पश्चिम आशियातील तणाव आता केवळ दोन देशांमधील वाद न राहता जागतिक महासत्तांमधील संघर्षाचे केंद्र बनला आहे. इस्लामाबाद येथे अमेरिका आणि इराणमध्ये सलग २१ तास चाललेली चर्चा निष्फळ ठरली. ‘अणुकार्यक्रमाच्या’ मुद्द्यावर ही चर्चा अडकल्याचे समजते. ही चर्चा फिस्कटताच ट्रम्प यांनी होर्मुझची नाकेबंदी केली.
अमेरिकेचे राष्ट्राध्यक्ष डोनाल्ड ट्रम्प यांनी होर्मुझ सामुद्रधुनीतून जाणाऱ्या जहाजांवर नियंत्रण मिळवण्याची धमकी दिल्यानंतर, चीनने उघडपणे इराणला पाठींबा दिला आहे. “आमच्या व्यापारात हस्तक्षेप खपवून घेणार नाही,” अशा स्पष्ट शब्दांत चीनने अमेरिकेला आव्हान दिले आहे.
इराणच्या अर्थव्यवस्थेची नाडी आवळण्यासाठी अमेरिका होर्मुझ सामुद्रधुनी येथे युद्धनौका तैनात करत असून, इराणनेही “या भागावर आमचेच नियंत्रण राहील,” असा पवित्रा घेतला आहे.
चीनसाठी हा मार्ग उर्जेच्या दृष्टीने जीवनवाहिनी आहे. चीनचे संरक्षण मंत्री ॲडमिरल डोंग जुन यांनी स्पष्ट केले की, इराणसोबतचे ऊर्जा करार कोणत्याही परिस्थितीत सुरूच राहतील.
चर्चा फिस्कटली असली तरी पूर्णपणे थांबलेली नाही. वृत्तानुसार, दोन्ही देश पुन्हा एकदा चर्चा करण्याची चिन्हे आहेत. ट्रम्प यांनीही “इराण पुन्हा चर्चेला आला तर अडचण नाही,” असे संकेत दिले आहेत.
