नवी दिल्ली: पंतप्रधान नरेंद्र मोदी यांच्याविरोधात अपमानास्पद वक्तव्य केल्याने काँग्रेस नेते राहुल गांधी अडचणीत आले आहेत. याप्रकरणी भाजपने निवडणूक आयोगाकडे धाव घेत तक्रार दाखल केली आहे. भाजपने आयोगाकडे कठोर कारवाईची मागणी केली आहे. यासोबतच भाजपने काँग्रेस अध्यक्ष खरगे यांच्यावरही कारवाई करण्याची मागणी केली आहे. मल्लिकार्जुन खरगे यांनी आरोप केला होता की, गुजरातचे मुख्यमंत्री असताना पंतप्रधान मोदींनी त्यांची जात ओबीसी यादीत समाविष्ट केली.
भाजपने आपल्या तक्रारीत म्हटले आहे की, मल्लिकार्जुन खरगे आणि राहुल गांधी यांच्या सततच्या फसव्या, निराधार आणि अपमानास्पद वागणुकीबद्दल आम्ही निवडणूक आयोगाला तत्काळ हस्तक्षेप करून योग्य कायदेशीर कारवाई करत दोघांविरुद्ध प्रतिबंधात्मक आदेश काढण्याची विनंती करतो. अन्यथा, यामुळे निवडणुकीचे वातावरण खराब होईल आणि आदरणीय व्यक्तींची बदनामी करण्यासाठी असभ्य, आक्षेपार्ह भाषा आणि बनावट बातम्यांचा वापर थांबवणे कठीण होईल.
राजस्थानमध्ये काँग्रेस नेत्यांनी आदर्श आचारसंहिता आणि कायद्याचे उल्लंघन केले आहे
राजस्थान विधानसभा निवडणुकीत काँग्रेस नेत्यांनी आदर्श आचारसंहिता आणि कायद्याचे उल्लंघन केल्याचे भाजपने म्हटले आहे. भाजपने तक्रारीत दोन्ही नेत्यांच्या भाषणातील उतारे नमूद केले आहेत. त्यावर आक्षेप घेत त्यांनी भाषणात असा उल्लेख करणे अपमानास्पद, अशोभनीय आणि चुकीचे असल्याचे म्हटले आहे. इकडे मध्य प्रदेशचे मुख्यमंत्री शिवराज सिंह चौहान यांनीही राहुल गांधींच्या वक्तव्यावर टीका केली आहे. ते म्हणाले की, देशातील जनता राहुल गांधींना कधीही माफ करणार नाही. मूर्खपणाचे यापेक्षा मोठे उदाहरण असूच शकत नाही.
