उत्तर प्रदेश : उत्तर प्रदेशात काल रात्री भीषण अपघात झाला. भोजीपुराजवळ शनिवारी रात्री एका कारला ट्रकने मोठी धडक दिली. धडक इतकी जोरदार होती की, एका लहान मुलासह आठ जणांचा दुर्दैवी मृत्यू झाला. बरेली-नैनिताल महामार्गावर ट्रकने एका कारला धडक दिली. अपघातातील सर्वजण एका लग्नाहून आपल्या घरी परतत होते. दरम्यान, ट्रकने धडक दिल्यानंतर अपघातग्रस्त कारने पेट घेतला. या घटनेत काही समजन्याच्या आत कार सेंट्रली लॉक झाली आणि सर्वांचा होरपळून मृत्यू झाला.
ट्रकने धडक दिल्यानंतर कारचा टायर फुटला आणि ती महामार्गाच्या विरुद्ध बाजूला पलटली. उत्तराखंडमधून रेती घेऊन आलेल्या या ट्रकने कारला काही अंतर फरपटत नेलं. ही कार मारुती सुझुकी एर्टिगा असल्याचं सांगण्यात येत आहे.
कार सेंट्रली लॉक होती, त्यामुळे कारने पेट घेतल्यानंतर प्रवाशांना बाहेर पडता आलं नाही. यामुळे कारमधील सर्वांना आगीत आपला जीव गमवावा लागला. मृतदेह बाहेर काढण्यात आले आहेत. मृतांमध्ये ७ प्रौढांसह एका अल्पवयीन मुलाचा समावेश आहे. मृतदेह शवविच्छेदनासाठी पाठवण्यात आले असून पुढील कारवाई केली जात आहे.
