Kanpur Age scam : उत्तर प्रदेशच्या कानपूरमधील एका दाम्पत्यानं इस्रायलमधील टाइम मशीनचा वापर करून ६० वर्षांच्या वृद्धाला २५ वर्षांवर आणून ठेवण्याचं आमिष दाखवत तब्बल ३५ कोटी रुपये लुबाडल्याचा धक्कादायक प्रकार समोर आला आहे. फसवणूक झाल्याचे लक्षात येताच अनेक लोकांनी पुढे येऊन तक्रार दाखल केली आहे. कानपूर पोलिसांनी दाम्पत्याविरोधात एफआयआर दाखल केला असून फरार झालेल्या ‘बंटी-बबली’चा शोध सध्या सुरू आहे. राजीव दुबे आणि पत्नी रश्मी दुबे असं फरार झालेल्या दाम्पत्याचे नाव आहे.
नेमक प्रकरण काय?
कानपूरच्या एका भागात दाम्पत्यानं रिव्हाइवल वर्ल्ड नावाचं थेरपी सेंटर सुरु केलं होतं. या सेंटरमध्ये ते वृद्धांना तरूण बनविण्याचं आश्वासन देऊन थेरपी देत होते. या दाम्पत्यानं इस्रायलवरून एक टाइम मशीन आणली आहे, ज्याद्वारे ते ऑक्सिजन थेरपी देऊन ६० वर्षांच्या वृद्धाला २५ वर्षांच्या तरुणासारखे बनवतील.
तसेच भारतातील प्रदूषणामुळं आपली हवा खराब झाली आहे. ज्यामुळं लवकर वृद्धत्व येत आहे. ऑक्सिजन थेरपी देऊन काही महिन्यात वृद्धांना तरुण करू, असे आश्वासन या दाम्पत्याने दिलं.
यसाठी दाम्पत्यानं सहा हजार रुपये आकारले होते. नेटवर्क मार्केटिंग व्यवसायाचा फंडा वापरून त्यांनी ग्राहकांची साखळी तयार केली. जे लोक नव्या ग्राहकांना जोडतील, त्यांना मोफत थेरपी सेशन देण्यात येत होते. यामध्ये कानपूर शहरातील अनेक नामवंत लोक जोडले गेले. या सर्व लोकांकडून कोट्यवधी रुपये गोळा झाल्यानंतर दाम्पत्यानं पळ काढला.
दरम्यान, एनडीटीव्हीनं फसवणूक झालेल्या काही ग्राहकांशी संवाद साधला. यामध्ये रेनू नावाच्या एका ग्राहक महिलेने सांगितलं की, आम्ही त्या दाम्पत्याच्या आमिषाला बळी पडलो. त्यांनी शहरात एक आलिशान थेरपी सेंटर उघडलं होतं. तिथे इस्रायलहून २५ कोटी रुपयांची टाइम मशीन आणली असल्याचं त्यांनी आम्हाला सांगितलं.
तसेच नेटवर्क मार्केटिंगच्या माध्यमातून व्यवसाय करण्यासाठी विविध स्किम आम्हाला दिल्या होत्या. सहा लाखांपासून ते ९० हजार रुपयांची गुंतवणूक करायची आणि ग्राहक जोडायचे, जेणेकरून मोठा परतावा मिळेल आणि मोफत उपचारही मिळतील, असे आमिष दाखवलं. मात्र, आम्हाला ऑक्सिजन थेरपीचे उपचार कधीच मिळाले नाहीत.
