नागपूर: मुख्यमंत्री देवेंद्र फडणवीस यांनी नागपूरमध्ये GEN-Z पिढीतील तरुणांशी संवाद साधला. यावेळी त्यांनी भारतीय संविधानामुळे सामान्य पार्श्वभूमी असलेल्या व्यक्तीलाही मोठ्या पदावर पोहोचण्याची संधी मिळते, असे सांगितले. एक सामान्य व्यक्ती मुख्यमंत्री होऊ शकते आणि चहा विकणारा व्यक्ती देशाचा पंतप्रधान बनू शकतो, असे उदाहरण त्यांनी दिले.
फडणवीसांच्या या वक्तव्यावरून शिवसेना खासदार संजय राऊत यांनी पंतप्रधान नरेंद्र मोदी यांच्यावर निशाणा साधला. माध्यमांशी बोलताना त्यांनी मोदी यांच्या बालपणीच्या चहा विक्रीच्या दाव्यावर थेट प्रश्न उपस्थित केला.
राऊत म्हणाले की, नरेंद्र मोदी यांनी गुजरातमध्ये चहा विकला होता, याचा ठोस पुरावा समोर आणला तर तर मी राजकारण सोडेन. या वक्तव्यामुळे महाराष्ट्राच्या राजकीय वर्तुळात चर्चेला सुरुवात झाली आहे.
मोदी यांच्या बालपणाशी संबंधित अनेक किस्से सार्वजनिकपणे सांगितले जातात. मोदी ज्या काळात गुजरातमधील रेल्वे स्थानकावर चहा विकत असल्याचे सांगितले जाते, त्या वेळच्या रेल्वे स्थानकाची आणि प्लॅटफॉर्मची परिस्थिती काय होती, असा प्रश्न त्यांनी उपस्थित केला. चहा विक्री नेमक्या कोणत्या ठिकाणी झाली, याबाबतही स्पष्टता आवश्यक असल्याचे राऊत यांनी म्हटले.
