मुंबई: कल्याणमधील एका (Shocking News) धक्कादायक खटल्याचा तब्बल ७ वर्षांनंतर निकाल लागला असून, स्वतःच्याच मुलीवर अत्याचार करणाऱ्या नराधम पित्याला (Mumbai Crime) न्यायालयाने कठोर शिक्षा सुनावली आहे. कल्याण विशेष पोक्सो (POCSO) न्यायालयाने या नराधमाला २० वर्षांच्या सक्तमजुरीची शिक्षा दिली असून, या निकालामुळे पीडित मुलीला उशिरा का होईना पण न्याय मिळाला आहे.
ही घटना ऑक्टोबर २०१९ मधील आहे. पीडित मुलगी १५ वर्षांची असताना तिच्या आईचे निधन झाले. आईच्या मृत्यूनंतर ती काही काळ नातेवाईकांकडे राहत होती. दरम्यान, वडिलांनी दुसरे लग्न केले आणि मुलीला पुन्हा स्वतःच्या घरी आणले. ज्या पित्याने मुलीचे रक्षण करणे अपेक्षित होते, त्याच नराधमाने घरात कुणी नसताना लेकीवर लैंगिक अत्याचार केले. इतकेच नाही तर या प्रकाराची कुठेही वाच्यता केल्यास ठार मारण्याची धमकीही दिली.
धमकीमुळे सुरुवातीला मुलगी प्रचंड घाबरली होती, मात्र तिने धीर एकवटून हा सर्व संतापजनक प्रकार आपल्या मावशी आणि काकांना सांगितला. नातेवाईकांनी तातडीने मानपाडा पोलीस ठाण्यात धाव घेत नराधम बापाविरुद्ध तक्रार नोंदवली. २०१९ पासून हे प्रकरण न्यायप्रविष्ट होते. पोलिसांनी भक्कम पुरावे गोळा केले आणि सरकारी वकील अश्विनी भामरे-पाटील व आर. आर. भोईर यांनी न्यायालयात प्रभावीपणे बाजू मांडली.
विशेष पोक्सो न्यायालयाचे न्यायाधीश व्ही. ए. पत्रावळे यांनी आरोपीला विविध कलमांखाली दोषी धरले. न्यायालयाने आरोपीला २० वर्षांची सक्तमजुरी आणि १० हजार रुपयांचा दंड सुनावला आहे. दंड न भरल्यास अतिरिक्त एक वर्षाची साधी कैद भोगावी लागेल. याशिवाय, अन्य कलमांखाली प्रत्येकी दोन ते तीन वर्षांचा कारावास आणि दंडाचीही शिक्षा सुनावण्यात आली आहे.
