मुंबई: महायुतीमधील जागावाटपाबाबत ताजी माहिती समोर येत असून, नाशिक आणि धाराशिवच्या जागेचा तिढा अखेर सुटला आहे. तसेच नाशिक आणि धाराशिवची जागा महायुतीत राष्ट्रवादी काँग्रेस पक्षाकडेच राहणार आहे. या दोन्ही जागेच्या उमेदवारांची नावाची घोषणा आजच होण्याची शक्यता आहे. नाशिक लोकसभा मतदारसंघासाठी ओबीसी नेते आणि मंत्री छगन भुजबळ आणि धाराशिवमधून विधान परिषदेचे आमदार विक्रम काळे यांना उमेदवारी दिली जाण्याची शक्यता आहे.
राष्ट्रवादी काँग्रेस पक्षाकडून धाराशिव लोकसभेसाठी विधानपरिषदचे आमदार विक्रम काळे यांचे नाव निश्चित झाल्याची माहिती मिळत आहे. राष्ट्रवादीचे प्रदेशाध्यक्ष खासदार सुनील तटकरे सोमवारी पत्रकार परिषद घेऊन धाराशिव लोकसभेसाठी आमदार विक्रम काळे आणि नाशिक लोकसभेसाठी मंत्री छगन भुजबळ यांच्या नावाची घोषणा करण्याची शक्यता आहे. आज सकाळीच आमदार विक्रम काळे यांनी उपमुख्यमंत्री अजित पवार यांची त्यांच्या देवगिरी या निवासस्थानी भेट घेतली आहे.
