Mumbai News : मुंबई: मुंबईत आयपीएल (IPL) सामन्यानंतर एक धक्कादायक घटना समोर आली आहे. मुंबई इंडियन्स आणि कोलकाता नाईट रायडर्स यांच्यातील सामना वानखेडे स्टेडियमवर पार पडला होता. या सामन्यात मुंबई इंडियन्सने जुना विक्रम मोडत विजय मिळवला. मात्र, या विजयानंतर दुसऱ्याच दिवशी मरिन ड्राईव्ह परिसरातील एका पंचतारांकित हॉटेलमध्ये एका व्यक्तीचा मृतदेह आढळल्याने खळबळ उडाली आहे.
मिळालेल्या माहितीनुसार, ट्रायडन्ट हॉटेलमध्ये विल्यम लेग्नफोर्ड नावाच्या व्यक्तीचा मृतदेह सापडला. ते बीसीसीआयशी संबंधित ब्रॉडकास्ट इंजिनियर म्हणून काम करत होते. आयपीएल सामन्यांच्या प्रसारणासाठी ते मुंबईत आले होते. ते 24 मार्चपासून हॉटेलमधील एका खोलीत राहत होते.
30 मार्च रोजी सकाळी हॉटेल कर्मचाऱ्यांनी त्यांच्याशी संपर्क साधण्याचा प्रयत्न केला. मात्र कोणताही प्रतिसाद मिळाला नाही. त्यामुळे संशय आल्याने कर्मचाऱ्यांनी मास्टर कीच्या मदतीने खोली उघडली. त्यावेळी आतमध्ये विल्यम लेग्नफोर्ड बेशुद्ध अवस्थेत आढळले. डॉक्टरांना तातडीने बोलावण्यात आले, पण त्यांनी त्यांना मृत घोषित केले.
या घटनेची नोंद मरिन ड्राईव्ह पोलिस ठाण्यात करण्यात आली असून पोलिसांनी तपास सुरू केला आहे. मृत्यूचे नेमके कारण अद्याप समोर आलेले नाही. पोस्टमॉर्टम अहवाल आल्यानंतर अधिक माहिती स्पष्ट होणार असल्याचे पोलिसांनी सांगितले आहे.
विल्यम लेग्नफोर्ड हे ब्रिटनचे नागरिक असून आयपीएल 2026 साठी ते भारतात आले होते. त्यांच्या अचानक मृत्यूमुळे आयपीएल वर्तुळात आणि क्रीडा क्षेत्रात मोठी खळबळ उडाली आहे. या प्रकरणाचा सखोल तपास सुरू असून पुढील काही दिवसांत अधिक तपशील समोर येण्याची शक्यता आहे.
