ठाणे : राजकारणात आपण अयशस्वी होत असल्याचे लक्षात आल्यावर दुसऱ्याच्या डोक्यावर नारळ फोडणे, हे त्यांचे पहिल्यापासून काम आहे, अशी टीका राष्ट्रवादीचे आमदार जितेंद्र आव्हाड यांनी केली. शरद पवार यांनी एकदा तरी मराठा आरक्षणाविरोधात वक्तव्य केल्याचे दाखवून द्यावे, असे खुले आव्हान आव्हाड यांनी उपमुख्यमंत्री देवेंद्र फडणवीस यांना दिले आहे. शनिवारी नागपूर येथील भाजपाच्या प्रदेश पदाधिकाऱ्यांच्या ‘महाविजय २०२४’ मेळाव्यात बोलताना उपमुख्यमंत्री देवेंद्र फडणवीस यांनी राष्ट्रवादीचे अध्यक्ष शरद पवार यांच्यावर टीका केली. मराठा आरक्षणाच्या संदर्भात आज राज्यात मोठी आंदोलने चालली आहेत. मराठा आरक्षणाचा इतिहास काढून पाहिला तर मराठा आरक्षणाला सर्वाधिक विरोध कुणी केला असेल तर तो शरद पवारांनी केला होता, असा आरोप देवेंद्र फडणवीस यांनी यावेळी केला. त्याला राष्ट्रवादीचे नेते जितेंद्र आव्हाड यांनी प्रतिउत्तर दिले आहे.
महाराष्ट्राचे राजकारण व्यवस्थित अभ्यासले तर मागील पन्नास वर्षांमध्ये आपण अयशस्वी झालो की, त्याचे खापर हे शरद पवार यांच्या नावावर फोडायचे. ही जुनीच पध्दत आहे. तुम्ही धनगरांना आरक्षण देणार होता आणि तेही पहिल्याच मंत्रिमंडळाच्या बैठकीत. पण, त्यांना अद्याप आरक्षण देऊ शकले नाहीत. मुस्लिम तसेच लिंगायत समाजाला आरक्षण देऊ शकले नाहीत. शिवाजी महाराजांच्या पुतळ्याला हात लावून राज्याचे मुख्यमंत्री एकनाथ शिंदे यांनी २४ डिसेंबरपर्यंत आरक्षण देऊ असे सांगितले होते. तारीख जवळ आली तरी अजून आरक्षणाबाबत काहीच झालेले नाही. त्यांनी दिलेली प्रत्येक आश्वासन फेल झाले आणि त्यामुळे विषयाला बगल देण्यासाठी शरद पवार यांचे नाव घेत आहेत, अशी टीका आमदार आव्हाड यांनी केली.
