मुंबई : ओशिवरा पोलीस ठाण्याच्या हद्दीत २५ वर्षीय विवाहितेची पतीने गळा आवळून हत्या केल्याची धक्कादायक घटना घडली आहे. या प्रकरणी पोलिसांनी आरोपी पतीला काही तासांतच अटक केली असून त्याच्याविरुद्ध हत्येचा गुन्हा दाखल करण्यात आला आहे.
मृत महिलेचे नाव शबरून नेला अन्सारी (वय २५) असून, अटक करण्यात आलेल्या आरोपीचे नाव सेराज अन्सारी आहे. दोघेही ओशिवरा येथील गुलशननगरमधील रोस्वाल्ट बिल्डिंगमध्ये राहत होते.
पोलिसांनी दिलेल्या माहितीनुसार, शबरूनचा हा दुसरा विवाह होता. लग्नानंतरही ती पहिल्या पतीच्या संपर्कात असल्याचा आणि त्याच्याशी वारंवार फोनवर बोलत असल्याचा संशय सेराजला होता. याच कारणावरून पती-पत्नीमध्ये सातत्याने वाद होत होते.
सोमवारी रात्री पुन्हा एकदा याच कारणावरून दोघांमध्ये जोरदार वाद झाला. संतापाच्या भरात सेराजने पत्नीचा गळा आवळून तिची हत्या केल्याचा आरोप आहे.
घटनेची माहिती मिळताच ओशिवरा पोलिसांनी घटनास्थळी धाव घेत मृतदेह ताब्यात घेतला. शवविच्छेदनासाठी मृतदेह रुग्णालयात पाठवण्यात आला असून आरोपी सेराज अन्सारीला अटक करण्यात आली आहे. या प्रकरणाचा पुढील तपास ओशिवरा पोलीस करत आहेत.
