मुंबई: केंद्र सरकारी कर्मचारी आणि पेन्शनधारकांचे लक्ष सध्या आठव्या वेतन आयोगाकडे लागले आहे. नव्या वेतनश्रेणीमुळे मूळ वेतन, महागाई भत्ता आणि पेन्शनमध्ये किती बदल होणार, याबाबत कर्मचाऱ्यांमध्ये उत्सुकता आहे. दरम्यान, २.१५ फिटमेंट फॅक्टर आणि २५ टक्के महागाई भत्ता (DA) गृहीत धरून संभाव्य पगाराची आकडेवारी समोर आली आहे. मात्र, ही गणना केवळ अंदाजासाठी असून अंतिम वेतन किती असेल, हे अधिकृत शिफारशी आणि केंद्र सरकारच्या निर्णयानंतरच स्पष्ट होईल.
सातव्या वेतन आयोगानुसार लेव्हल ६ मधील कर्मचाऱ्यांचे सध्याचे मूळ वेतन ३५,४०० रुपये आहे. त्यावर २.१५ फिटमेंट फॅक्टर लावल्यास सुधारित मूळ वेतन ७६,११० रुपये होते. त्यावर २५ टक्के DA म्हणजे सुमारे १९,०२८ रुपये गृहीत धरल्यास एकूण रक्कम ९५,१३८ रुपये होऊ शकते.
लेव्हल ७ मधील कर्मचाऱ्यांचे सध्याचे मूळ वेतन ४४,९०० रुपये आहे. २.१५ फिटमेंट फॅक्टरनुसार त्यांचे संभाव्य मूळ वेतन ९६,५३५ रुपये होईल. त्यावर २५ टक्के DA म्हणजे सुमारे २४,१३४ रुपये धरल्यास एकूण रक्कम अंदाजे १,२०,६६९ रुपये होऊ शकते.
लेव्हल ८ मधील कर्मचाऱ्यांचे सध्याचे मूळ वेतन ४७,६०० रुपये आहे. याच गणनेनुसार संभाव्य मूळ वेतन १,०२,३४० रुपये आणि त्यावरील २५ टक्के DA सुमारे २५,५८५ रुपये होईल. त्यामुळे एकूण रक्कम अंदाजे १,२७,९२५ रुपये होऊ शकते.
मात्र, या रकमांना अंतिम पगार समजू नये. आठव्या वेतन आयोगात नेमका फिटमेंट फॅक्टर किती असेल, महागाई भत्ता मूळ वेतनात समाविष्ट केला जाणार का आणि सुधारित वेतनश्रेणी कशी असेल, याबाबत अंतिम निर्णय झाल्यानंतरच प्रत्यक्ष वेतन निश्चित होईल. तसेच, हातात मिळणारा पगार हा इतर भत्ते, कपाती आणि लागू असलेल्या नियमांनुसार वेगळा असू शकतो. त्यामुळे सध्या या आकडेवारीकडे संभाव्य गणना म्हणूनच पाहणे योग्य ठरेल.
