मुंबई : शेतकऱ्यांना पीक कर्ज देताना बँका जर सिबीलची मागणी करत असतील तर ते खपवून घेतलं जाणार नाही, तसेच त्यांच्यावर एफआयआर दाखल केली जाईल, असा इशाराच राष्ट्रीय बँकांना उपमुख्यमंत्री देवेंद्र फडणवीस यांनी दिला आहे. एवढंच नाही तर FIR दाखल केल्यावर आमच्याकडे येऊ नका असा सज्जड दम फडणवीस यांनी भरला आहे. त्यांनी आज खरीप पूर्व हंगाम बैठकीनंतर माध्यमांशी संवाद साधला.
शेतकऱ्यांना कर्ज देताना सिबीलची मागणी करू नये. ज्या बँका सिबीलची अट ठेवून कर्ज नाकारतील त्यांच्यावर आम्ही एफआयर दाखल करू. हीच माहिती तुम्ही बँकेला द्या, अशा सुचना आरबीआयच्या प्रतिनिधींना आणि राज्य पातळीवरील बँक कमिटींना देण्यात आल्याची माहिती फडणवीस म्हणालेत.
काय म्हणाले देवेंद्र फडणवीस ?
देवेंद्र फडणवीस म्हणाले, मुख्यमंत्री एकनाथ शिंदे यांच्या नेतृत्त्वाखाली दोन बैठका झाल्या. एक बैठक स्टेट लेव्हल बँकांची होती, तर दुसरी बैठक ही खरीप हंगामासंदर्भात होती. या बैठकीत रिझर्व्ह बँकेच्या प्रतिनिधींना आणि स्टेट बँकेच्या कमिटीला सांगण्यात आलं की, कोणत्याही बँकांनी सीबीलचे कारण सांगून शेतकऱ्यांना कर्ज नाकारु नये, तसे जर झाले तर FIR दाखल करू. याबाबतची माहिती सर्व बँकांना द्यावी असं देवेंद्र फडणवीस म्हणाले.
दरम्यान, शेतकऱ्यांना कर्ज मिळताना येणाऱ्या अडचणी दूर करण्याचा प्रयत्न आम्ही केला. खरीप पूर्व बैठकीत बियाणे खतांची उपलब्धता यावर चर्चा झाली. शेतकऱ्यांना पिक विमा मिळाला पाहिजे, याचा आढावा आजच्या बैठकीत आम्ही घेतला आहे. खरीपाच्या हंगामात शेतकऱ्यांना कोणताही त्रास होऊ नये याची काळजी घेतल्याचे देवेंद्र फडणवीस यांनी यावेळी सांगितले.
नॅनो खतांचा वापर वाढला पाहिजे : देवेंद्र फडणवीस
पुढे बोलताना फडणवीस म्हणाले, डीपीए खतांचा वापर कमी झाला पाहिजे, आणि नॅनो खतांचा वापर वाढला पाहिजे. यासाठी प्रयत्न करणे गरजेचं आहे. तसेच जास्तीत जास्त शेतकऱ्यांना पिक विमा मिळाला पाहिजे. रासायनिक खतांचे लिकिंग करणाऱ्यांवर कठोर कारवाई करण्यात येणार आहे, असंही देवेंद्र फडणवीस यावेळी म्हणाले.
