मुंबई : देशातील आघाडीच्या सरकारी बँकांपैकी एक असलेल्या स्टेट बँक ऑफ इंडियाच्या (SBI) ग्राहकांच्या माहितीच्या सुरक्षेबाबत गंभीर प्रकार समोर आला आहे. बँकेच्या तब्बल 4,280 ग्राहकांचा गोपनीय डेटा हॅकर्सनी चोरल्याची माहिती उघड झाली आहे. विशेष म्हणजे, ग्राहकांसाठी असलेल्या YONO 2.0 मोबाइल अॅपच्या सुरक्षा यंत्रणेला भेदून हॅकर्सनी थेट बँकेच्या सर्व्हरमध्ये प्रवेश केल्याचे सांगितले जात आहे.
मिळालेल्या माहितीनुसार, 9 ते 15 ऑक्टोबरदरम्यान नवी मुंबईतील सीबीडी बेलापूर येथील एसबीआयच्या ग्लोबल आयटी सेंटरमधील सर्व्हरवर हा सायबर हल्ला झाला. या हल्ल्यात ग्राहकांच्या बँक व्यवहारांशी संबंधित सुमारे 3 लाख 75 हजार नोंदी आणि 2,721 पीडीएफ फाइल्स चोरीला गेल्याची माहिती आहे.
चोरी केलेला डेटा हॅकर्सनी डार्कनेटवर टाकल्याचे समोर आले आहे. त्यामुळे ही माहिती इतर सायबर गुन्हेगारांपर्यंत पोहोचण्याची शक्यता व्यक्त केली जात आहे. अशा परिस्थितीत ग्राहकांच्या वैयक्तिक आणि आर्थिक माहितीचा गैरवापर होण्याची भीती निर्माण झाली आहे.
डेटा चोरीचा प्रकार लक्षात आल्यानंतर एसबीआयच्या सायबर सुरक्षा विभागाने तज्ज्ञांच्या मदतीने संबंधित सर्व्हर सुरक्षित केला. डार्कनेटवर उपलब्ध झालेला डेटा हटवण्यात आल्याची माहितीही बँकेने पोलिसांना दिल्याचे सांगण्यात आले आहे. या प्रकरणी 12 नोव्हेंबर रोजी सीबीडी बेलापूर पोलीस ठाण्यात गुन्हा दाखल करण्यात आला.
वरिष्ठ पोलीस निरीक्षक अरुण पवार यांनी दिलेल्या माहितीनुसार, बँकेने सर्व्हर सुरक्षित करून पुढील डेटा चोरी रोखली आहे. दरम्यान, ऑनलाइन व्यवहार करताना सतर्क राहण्याचे आवाहन करण्यात येत आहे.
