Cyber Crime : मुंबई: ऑनलाइन शॉपिंग (Online Shopping) करताना सावध राहण्याची गरज पुन्हा एकदा समोर आली आहे. मुंबईतील परळ परिसरात राहणाऱ्या एका महिलेला डिलिव्हरीच्या नावाखाली तब्बल 98 हजार रुपयांची फसवणूक झाल्याची घटना घडली आहे. या प्रकारामुळे सायबर गुन्हेगारांची नवीन पद्धत उघडकीस आली आहे.
मिळालेल्या माहितीनुसार, परळ येथील रहिवासी प्रियंका शहा (वय 41) यांनी एका वेबसाइटवरून कपड्यांची ऑर्डर दिली होती. काही दिवसांनी त्यांना एका अनोळखी क्रमांकावरून फोन आला. फोन करणाऱ्या व्यक्तीने स्वतःला डिलिव्हरी कंपनीचा कर्मचारी असल्याचे सांगितले. तुमच्या ऑर्डरच्या पेमेंटमध्ये अडचण आहे आणि ती दुरुस्त केल्याशिवाय पार्सल मिळणार नाही, असे सांगून आरोपीने त्यांचा विश्वास जिंकला.
यानंतर आरोपीने त्यांना एक QR कोड पाठवून पैसे ट्रान्सफर करण्यास सांगितले. सुरुवातीला थोडी रक्कम भरल्यानंतर आरोपीने तांत्रिक कारणामुळे जास्त पैसे कापले गेल्याचे सांगितले आणि ते परत देण्याचे आश्वासन दिले. रिफंडच्या नावाखाली आरोपीने वारंवार वेगवेगळ्या खात्यांमध्ये पैसे ट्रान्सफर करण्यास भाग पाडले. या प्रक्रियेत त्यांच्या खात्यातून एकूण 98 हजार रुपये काढले गेले.
नंतर आपली फसवणूक झाल्याचे लक्षात येताच त्यांनी तात्काळ 1930 या सायबर हेल्पलाइनवर संपर्क साधला. तसेच भोईवाडा पोलीस ठाण्यात अज्ञात व्यक्तीविरोधात गुन्हा दाखल करण्यात आला आहे. या प्रकरणाचा तपास सुरू आहे.
दरम्यान, पोलिसांनी नागरिकांना ऑनलाइन व्यवहार करताना काळजी घेण्याचे आवाहन केले आहे. अनोळखी व्यक्तींनी पाठवलेले QR कोड स्कॅन करू नयेत तसेच कोणालाही बँकेची माहिती देऊ नये, असे सांगण्यात आले आहे.
