मुंबई : बिग बॉस ओटीटी विजेता आणि युट्युबर एल्विश यादव विरोधात गुन्हा दाखल करण्यात आला. नोएडातील रेव्ह पार्टीवरील छाप्यादरम्यान एल्विश यादवसह पाच जणांविरोधात गुन्हा दाखल करण्यात आला आहे. गणपतीत मुख्यमंत्री एकनाथ शिंदे यांच्या वर्षा बंगल्यावर एल्विश यादव आला होता. त्याने गणपतीची आरतीही केली होती. आता याचे फोटो शेअर करत विरोधकांनी टीका केली आहे. राज्याच्या मुख्यमंत्र्यांच्या बंगल्यावर एल्विश यादव सारख्या विषारी नशाबाजांचा सुळसुळाट झाला आहे. नशाबाज तरुणाला राज्यातील तरुणांचे रोल मॉडेल बनवण्यात हातभार लावत आहे का? असे म्हणत विधानसभेचे विरोधी पक्षनेते विजय वडेट्टीवारांनी जोरदार निशाणा साधला आहे. तर महाराष्ट्राच्या मुख्यमंत्र्यांचे निवासस्थान गुन्हेगारांसाठी पर्यटनस्थळ झाले आहे का? असा प्रश्न काँग्रेस प्रवक्ते अतुल लोंढे यांनी केला आहे
विरोधी पक्ष नेते विजय वडेट्टीवार म्हणाले, मुख्यमंत्र्यांच्या बंगल्यावर एल्विश यादव सारख्या विषारी नशाबाजांचा सुळसुळाट झाला आहे. शाल आणि नारळ देऊन मुख्यमंत्र्यांच्या हस्ते आदरतिथ्य करण्यात आले. मुख्यमंत्र्यांचे शासकीय निवासस्थान असलेल्या वर्षा बंगल्यावर बोलावून आदरतिथ्य केले होते, ज्याच्यावर सापाच्या विषापासून ड्रग्ज बनवणे, सेवन करणे आणि विकणे यासारखे गंभीर गुन्हा दाखल करण्यात आला आहे. तसेच महिलांबाबत अपशब्द वापरणारा, विषारी ड्रग्सचे सेवन विक्री करणाऱ्या आरोपीचा पाहुणचार करून मुख्यमंत्री एल्विश यादव सारख्या नशाबाज तरुणाला राज्यातील तरुणांचे रोल मॉडेल बनवण्यात हातभार लावत आहे का? आधीच महाराष्ट्रात ड्रग कारखाने सापडत आहेत. ड्रग्स माफिया ललित पाटील शासकीय पाहुणचार घेतो, मग पळवून लावला जातो आणि इथे वर्षावर नशाबाज आरती करतो हेच ते महायुती सरकार आहे.
अतुल लोंंढेंचा संतप्त सवाल
महाराष्ट्राच्या मुख्यमंत्र्यांचे निवासस्थान हे गुन्हेगारांसाठी पर्यटनस्थळ झाले आहे का ? एकनाथ शिंदे यांच्या काळात विषारी सापांच्या विषाच्या रेव्ह पार्ट्या आयोजित करणाऱ्या एल्वीस यादव सारख्या टुकार युट्युबरला विशेष आमंत्रण देऊन गणपतीच्या आरतीला बोलावले होते. आता नोएडा पोलिसांनी विषारी रेव्ह पार्टी आयोजित केल्याप्रकरणी एल्वीस यादव व त्याच्या साथीदारांविरोधात गुन्हा नोंदवला असून त्यांच्याकडे जिवंत विषारी साप सापडले आहेत. अरे कुठे नेऊन ठेवलाय महाराष्ट्र माझा? असा संतप्त सवाल काँग्रेसचे प्रवक्ते अतुल लोंढेंनी सरकारला केला आहे.
