Ajit Pawar: मुंबई: राज्यात दिवाळीची धामधूम सुरू आहे, तर दुसरीकडे मोठ्या राजकीय हालचाली होत आहेत. राज्याचे उपमुख्यमंत्री अजित पवार आणि शरद पवार यांची पुण्यात शुक्रवारी भेट झाली. या भेटीनंतर अजित पवार दिल्लीला गेले असून केंद्रीय गृहमंत्री अमित शाह यांची भेट घेणार आहेत. यामुळे राज्यातील राजकीय वर्तुळात चर्चेला उधाण आलं आहे. अशावेळी भारतीय जनता पक्षाने अजित पवारांच्या मनात काय? हे आम्ही कसं सांगणार अशा शब्दांत सावध भूमिका घेतली आहे.
भाजपा नेते आणि आमदार प्रवीण दरेकर म्हणाले की, याबद्दल आता चर्चा काही रंगू शकते, चर्चा काहीही असू शकते. उपमुख्यमंत्री अजित पवार आणि शरद पवार यांनाच माहिती असेल ते दिल्लीला का आणि कशासाठी गेले. सध्या दिवाळी आहे, ते राज्याचे उपमुख्यमंत्री देखील आहेत. दिवाळीच्या शुभेच्छा देण्यासाठी ते भेटू शकतात. तसेच राजकीय भेट किंवा उद्देशही असू शकतो. आता अजित पवार यांच्या मनात काय हे आम्ही कसं सांगणार? अशी सावध भूमिका त्यांनी घेतली.
