Ajit Pawar Death : महाराष्ट्राच्या राजकारणात पुन्हा एकदा खळबळ उडवणारे वक्तव्य ठाकरे गटाचे खासदार संजय राऊत यांनी केले आहे. उपमुख्यमंत्री अजित पवार यांच्या कथित विमान अपघाताबाबत त्यांनी संशय व्यक्त करत अनेक गंभीर प्रश्न उपस्थित केले आहेत. या दाव्यांमुळे सत्ताधारी आणि विरोधकांमध्ये नव्या वादाला तोंड फुटले आहे.
संजय राऊत यांच्या म्हणण्यानुसार, 15 जानेवारी रोजी अजित पवार यांनी “भाजपच्या घोटाळ्यांची फाईल माझ्याकडे आहे, योग्य वेळी उघड करेन,” असे विधान केले होते. त्यानंतर अवघ्या दहा दिवसांत त्यांचा विमान अपघात झाल्याचा दावा केला जातो. ही वेळ आणि घटनांचा क्रम “रहस्यमय” असल्याचे सांगत राऊत यांनी थेट जस्टिस लोया प्रकरणाची आठवण करून दिली. मात्र, “मी कोणावरही थेट आरोप करत नाही, पण लोकांच्या मनात शंका आहेत,” असेही त्यांनी स्पष्ट केले. (Ajit Pawar Death)
या संशयांना आणखी धार देणारे प्रश्न राष्ट्रवादी काँग्रेस (शरद पवार गट) आमदार अमोल मिटकरी यांनी उपस्थित केले आहेत. अजित पवार यांच्यासारखा महत्त्वाचा नेता प्रवास करत असताना त्यांच्या सोबत दुसरा कोणताही वरिष्ठ नेता का नव्हता? विमानाकडे वैध मेंटेनन्स सर्टिफिकेट होते का? सहा प्रवासी असल्याचे सांगितले जाते, पण पाच मृतदेहच सापडल्याचे वृत्त का येते? सर्व देह जळून खाक झाले असताना काही कागद मात्र सुरक्षित कसे राहिले? आणि सर्वात महत्त्वाचे म्हणजे, त्या विमानात भाजपच्या कथित भ्रष्टाचाराची फाईल होती का, असे प्रश्न त्यांनी उपस्थित केले.
राऊत यांच्या मते, अजित पवार पुन्हा शरद पवार यांच्यासोबत जाण्याच्या मानसिकतेत होते. भाजपपासून दूर जाणे हा भाजपसाठी मोठा राजकीय धक्का ठरला असता आणि सत्तेतील “दहशत” मोडली गेली असती, असा त्यांचा दावा आहे. त्यामुळेच ही घटना केवळ अपघात नसून गंभीर चौकशीची गरज असल्याचे ते सांगतात.
हे प्रकरण महत्त्वाचे ठरण्याचे कारण म्हणजे, अजित पवार हे सध्याच्या सत्तासंरचनेतील कळीचे व्यक्तिमत्त्व आहेत. त्यांच्या संदर्भातील अशा आरोपांमुळे सरकारची विश्वासार्हता, सत्ताधारी पक्षांमधील अंतर्गत संघर्ष आणि राज्यातील राजकीय स्थैर्य यावर प्रश्नचिन्ह उभे राहते. त्यामुळे या आरोपांवर स्पष्टता आणि पारदर्शक चौकशी होणार का, याकडे आता संपूर्ण महाराष्ट्राचे लक्ष लागले आहे.
