पुणे : पुण्यातील कोंढवा परिसरातील एका उच्चभ्रू सोसायटीमध्ये धक्कादायक प्रकार घडला आहे. किरकोळ कारणावरून वाद झाल्याने त्याचा बदला घेण्यासाठी सोसायटीचा सेक्रेटरी व त्याच्या मुलाने सोसायटीमध्ये राहणाऱ्या एका कुटूंबावर तंत्रमंत्राच्या सहाय्याने काळी जादू केल्याचा प्रकार समोर आला आहे.
याबाबत सोसायटीतील रूपेश अग्रवाल यांनी पोलिसांकडे तक्रार दिल्यानंतर सोसायटीच्या सेक्रेटरीसह त्याच्या मुलाविरुद्ध कोंढवा पोलिसांनी जादूटोणा प्रतिबंध कायद्याअंतर्गत गुन्हा दाखल केला आहे. राजकुमार जोशी आणि त्यांचा मुलगा अंकुर जोशी (रा. पिकासो पॅराडाईज अपार्टमेंट, सह्याद्री पार्क, साळुंखे विहार, कोंढवा) अशी गुन्हा दाखल करण्यात आलेल्यांची नावे आहेत.
अग्रवाल आणि जोशी साळुंखे विहार रस्त्यावरील पिकासो परेडाईज अपार्टमेंटमध्ये राहायला आहेत. रूपेश अग्रवाल आणि त्यांचे वडील १४ मार्च रोजी सोसायटीतून निघाले होते. त्या वेळी सोसायटीतील रखवालदार जागेवर नव्हता. अग्रवाल सोसायटीचे चिटणीस राजकुमार जोशी यांच्याकडे गेले. तेव्हा रखवालदार नसून, माझी जागेवर गाडी धुण्यासाठी त्याला पाठविले असल्याचे जोशी यांनी सांगितले. सोसायटीतील रखवालदाराला वैयक्तिक काम का सांगता ? अशी विचारणा अग्रवाल यांनी त्यांच्याकडे केली.
याकारणावरून अग्रवाल आणि जोशी यांच्यात वाद झाला. जोशी यांनी अग्रवाल पिता-पुत्रांना शिवीगाळ केली, अग्रवाल यांच्याविरुद्ध जोशी यांनी पोलिसांकडे तक्रार दिली. त्यानंतर जोशी यांनी त्रास देण्यासाठी सोसायटीच्या प्रवेशद्वार लिंबू ठेवले.
काळी बाहुली जाळून अग्रवाल यांना धमकावले. जोशी यांनी अघोरी कृत्य केल्याने असावाल कुटुंबीय घाबरले. रूपेश यांचा मोठा भाऊ राकेश आणि मामा किशनचंद अग्रवाल यांचा जोशी यांनी पाठलाग करून दहशत निर्माण केली. जोशी यांच्या त्रासामुळे राकेश यांना हृदयविकाराचा झटका आला, असे रूपेश यांनी फिर्यादीत म्हटले आहे.
