पुणे : दिल्लीतील जंतरमंतर येथे झालेल्या तीव्र आंदोलनानंतर अखेर केंद्र सरकारला माघार घ्यावी लागली असून शिक्षणमंत्री धर्मेंद्र प्रधान यांनी आपल्या पदाचा राजीनामा दिला आहे. ‘कॉकरोच जनता पार्टी’चे संस्थापक अभिजित दीपके यांनी या निकालावर आनंद व्यक्त करत, “सरकार कितीही शक्तिशाली असले तरी अन्यायाविरोधात एकत्र आल्यास त्यांना झुकवता येते,” अशी प्रतिक्रिया दिली. गेल्या 12 वर्षांत पहिल्यांदाच अशा प्रकारे एखाद्या केंद्रीय मंत्र्याला पद सोडावे लागले आहे.
मंत्री धर्मेंद्र प्रधान यांच्या राजीनाम्याची बातमी समजताच दीपके भावुक झाले. मात्र, आंदोलन एवढ्यावरच थांबणार नसल्याचे त्यांनी स्पष्ट केले. त्यांनी प्रमुख मागण्या लावून धरल्या आहेत.यामध्ये आत्महत्या केलेल्या विद्यार्थ्यांच्या कुटुंबीयांना १ कोटी रुपयांची आर्थिक मदत मिळावी.आंदोलनकर्त्या विद्यार्थ्यांवर अन्याय करणाऱ्या आणि बळाचा वापर करणाऱ्या पोलीस अधिकाऱ्यांवर कठोर कारवाई व्हावी. आंदोलनादरम्यान विद्यार्थ्यांवर दाखल केलेले सर्व गुन्हे त्वरित मागे घेण्यात यावेत.
योगायोगाने, राष्ट्रीय स्वयंसेवक संघाचे प्रमुख मोहन भागवत यांनी सकाळी तरुण पिढीशी संवाद साधण्याचे महत्त्व अधोरेखित केले होते. “सत्तेच्या जोरावर हुकूमशाही चालणार नाही, तरुणांच्या शंकांचे निरसन संवादातूनच व्हायला हवे,” असे मत भागवत यांनी मांडले होते. त्यांच्या या वक्तव्यानंतर अवघ्या 4 तासांत शिक्षणमंत्र्यांचा राजीनामा समोर आला.
दुसरीकडे ‘नीट’ परीक्षा गैरव्यवहार प्रकरणी सरकारने आधीच कठोर पावले उचलण्यास सुरुवात केली आहे.शुक्रवारी रात्री राष्ट्रीय चाचणी संस्थेच्या 47 अधिकाऱ्यांना थेट सेवेतून बडतर्फ करण्यात आले असून त्यांच्यावर गुन्हे दाखल केले जात आहेत.शिक्षण मंत्रालयातील 2 मुख्य सचिवांची तडकाफडकी बदली करण्यात आली आहे.
