हिंगोली: राज्यात सायबर गुन्हेगारीचे प्रमाण वाढत असून, हिंगोली जिल्ह्यात अशाच एका फसवणुकीची घटना उघडकीस आली आहे. व्हॉट्सॲपवर आलेल्या एका बनावट लग्नपत्रिकेमुळे एका सरकारी कर्मचाऱ्याला जवळपास 2 लाख रुपयांचा फटका बसला आहे.
या कर्मचाऱ्याला एका अनोळखी नंबरवरून 30 ऑगस्टच्या लग्नाचे निमंत्रण आले होते. त्यात ‘नमस्कार, लग्नाला नक्की या बरं का… 30/08/2025’ असे लिहिलेले होते. पण, हे निमंत्रण एका पीडीएफ (PDF) फाइलसारखे दिसत असले तरी, प्रत्यक्षात ती एक APK (Android Application Package) फाइल होती.
कर्मचाऱ्यांनी ही बनावट फाइल उघडताच सायबर गुन्हेगारांना त्यांच्या फोनमधील सर्व खासगी डेटाचा ॲक्सेस मिळाला. त्यानंतर काही वेळातच त्यांच्या बँक खात्यातून 1,90,000 रुपये आरोपींच्या खात्यात गेले.
ही घटना समोर आल्यानंतर हिंगोली पोलीस ठाण्यात आणि सायबर सेलमध्ये अज्ञात व्यक्तीविरोधात गुन्हा दाखल करण्यात आला आहे. ही घटना समोर आल्यानंतर गुन्हेगारांचा नवीन पद्धत पाहून पोलीसही चक्रावले असून नागरिकांनी डिजिटल फसवणुकीपासून सावध राहण्याचे आवाहन पोलिसांनी केले आहे. पोलिसांनी या प्रकरणाची सखोल चौकशी सुरू केली असून, अशा प्रकारच्या डिजिटल फसवणुकीपासून स्वतःचा बचाव करण्यासाठी नागरिकांनी तातडीने सायबर पोलिसांशी संपर्क साधण्याचे आवाहन केले आहे.
