पुणे, : राजमाता पुण्यश्लोक अहिल्यादेवी होळकर यांच्या 300 व्या जयंतीनिमित्त पुण्यश्लोक अहिल्यादेवी महाराष्ट्र मेंढी व शेळी विकास महामंडळामार्फत विविध उपक्रमांचे आयोजन करण्यात आले आहे. अशी माहिती पशुसंवर्धन मंत्री श्रीमती पंकजा मुंडे यांनी दिली.
“समाजसुधारक, धर्मनिरपेक्ष, स्त्री-पुरुष समानतेच्या पुरस्कर्त्या असलेल्या अहिल्याबाई होळकर यांच्या जीवनमूल्यांचा आदर्श घेऊन हा उपक्रम राबविण्यात येत आहे.” परिसर स्वच्छता व सुशोभीकरण, मेंढपाळांची भेट व तांत्रिक मार्गदर्शन, शेळ्या-मेंढ्यांचे मान्सूनपूर्व लसीकरण, पशुधनाचे जंत व गोचीड निर्मूलन, करडे-कोकरे मरतूक कमी करण्यासाठी उपाययोजना, तांत्रिक मार्गदर्शन शिबिरे व परिसंवाद असे उपक्रम राबविण्यात येणार आहेत.
या उपक्रमांमुळे मेंढी-शेळीपालकांशी थेट संवाद साधता येणार असून, शासनाच्या विविध योजना व तांत्रिक माहिती त्यांच्यापर्यंत पोहोचविणे शक्य होणार आहे. यामुळे शेळी-मेंढीपालन व्यवसाय अधिक व्यावसायिक व किफायतशीर करण्यासाठी धोरणनिर्मिती सुलभ होईल, असा विश्वासही मंत्री मुंडे यांनी व्यक्त केला.
महामंडळाचे व्यवस्थापकीय संचालक डॉ. शीतलकुमार मुकणे यांच्या मार्गदर्शनाखाली महामंडळाच्या मुख्यालयातही अभिवादनपर कार्यक्रमाचे आयोजन करण्यात आले आहे. “या उपक्रमांची यशस्वी अंमलबजावणी व्हावी यासाठी सर्व संबंधित अधिकाऱ्यांनी जबाबदारीने काम करावे,” असे निर्देशही मंत्री पंकजा मुंडे यांनी दिले आहेत.
दरम्यान, शेळी-मेंढीपालनाला आधुनिक व्यवसाय व्यवस्थापनाच्या माध्यमातून अधिक किफायतशीर करण्यासाठी आवश्यक धोरणांची निर्मिती व अंमलबजावणी करणे सुलभ होईल”, असा विश्वासही मंत्री पंकजा मुंडे यांनी व्यक्त केला आहे.
