UPSC Result Out : केंद्रीय लोकसेवा आयोगाचा (UPSC) निकाल जाहीर झाला की देशभरातून यशाच्या अनेक प्रेरणादायी कथा समोर येतात. मात्र, यंदाच्या निकालाने एका वेगळ्याच नाट्यमय वादाला जन्म दिला. निकालाच्या यादीतील Rank 301 वर दोन विद्यार्थिनींनी दावा केल्याने काही काळ प्रशासकीय वर्तुळात आणि सोशल मीडियावर मोठा गोंधळ निर्माण झाला होता. अखेर तांत्रिक पडताळणीनंतर हा पेच सुटला असून, खरी ‘आकांक्षी’ कोण, हे स्पष्ट झाले आहे.
नेमका वाद काय होता?
UPSC ने जाहीर केलेल्या गुणवत्ता यादीत Rank 301 वर ‘आकांक्षा सिंह’ हे नाव झळकले. निकालाची बातमी वाऱ्यासारखी पसरली आणि दोन वेगवेगळ्या राज्यांतील दावेदारांनी या रँकवर आपला हक्क सांगितला.
-
पहिली होती बिहारमधील आरा येथील आकांक्षा सिंह, जी प्रतिबंधित ‘रणवीर सेना’चे संस्थापक ब्रह्मेश्वर सिंग यांची नात आहे.
-
दुसरी होती उत्तर प्रदेशातील गाजीपूर जिल्ह्यातील अभैपूर गावची रहिवासी असलेली आकांक्षा सिंह.
एकाच नावामुळे आणि एकाच रँकमुळे दोन्ही कुटुंबांत आनंदाचे वातावरण होते, मात्र अधिकृतरीत्या ही जागा कोणाची, यावरून संभ्रम निर्माण झाला होता.
शोकाकुल घरात आनंदाची लाट
गाजीपूरच्या आकांक्षा सिंहची यशोगाथा अत्यंत भावूक करणारी आहे. निकाल जाहीर झाला तेव्हा आकांक्षाच्या घरी तिच्या आजोबांच्या निधनामुळे दुःखाचे सावट होते. घरात ‘गरुड पुराणा’चे पठण सुरू असतानाच आकांक्षाला एका मैत्रिणीचा फोन आला आणि तिने Rank 301 मिळवल्याचे सांगितले. एका बाजूला आजोबांच्या निधनाचे दुःख आणि दुसऱ्या बाजूला आयुष्यातील सर्वात मोठ्या यशाचा आनंद, अशा संमिश्र भावनांनी संपूर्ण कुटुंब गहिवरले.
पेच कसा सुटला?
हा गोंधळ दूर करण्यासाठी गाजीपूरच्या आकांक्षाने तिचा रोल नंबर आणि इतर अधिकृत कागदपत्रे तिच्या मित्रांना पाठवली. त्यानंतर यूपीएससीच्या अधिकृत वेबसाईटवर जाऊन रोल नंबर आणि वडिलांच्या नावाची पडताळणी करण्यात आली. दुपारी सुमारे 12:00 PM च्या सुमारास तांत्रिक तपासणी पूर्ण झाली आणि हे स्पष्ट झाले की, Rank 301 वर निवड झालेली आकांक्षा ही गाजीपूरचीच आहे. या पुष्टीनंतर तिच्या कुटुंबाचा आनंद गगनात मावेनासा झाला.
