पुणे: पुण्यातील नऱ्हे पोलीस ठाण्याच्या हद्दीतील कथित 1 कोटी रुपयांच्या लूटप्रकरणामुळे पोलीस विभागात मोठी खळबळ उडाली आहे. या प्रकरणात पुणे ग्रामीण पोलीस दलातील दोन कर्मचाऱ्यांचा सहभाग समोर आल्यानंतर प्रशासनाने त्यांच्यावर निलंबनाची कारवाई केली आहे. या दोघांविरुद्ध गुन्हाही दाखल असून ते सध्या फरार असल्याची माहिती मिळाली आहे.
निलंबित करण्यात आलेल्या पोलिसांची नावे प्रमिला निकम आणि अजिज मेस्त्री अशी आहेत. या दोघांचा कथित लूटप्रकरणाशी संबंध असल्याचा आरोप असून, वरिष्ठ अधिकाऱ्यांनी प्राथमिक चौकशीनंतर त्यांच्यावर कारवाई केली आहे. या घटनेनंतर पोलीस विभागात अंतर्गत चौकशीही सुरू करण्यात आली आहे.
मिळालेल्या माहितीनुसार, 18 जुलै रोजी नवले पूल परिसरात एका व्यापाऱ्याला लक्ष्य करण्यात आले होते. या घटनेत सुमारे 1 कोटी रुपयांच्या रकमेवर डल्ला मारण्याचा कट रचल्याचा आरोप आहे. या प्रकरणी एकूण 10 जणांविरुद्ध नऱ्हे पोलीस ठाण्यात गुन्हा दाखल करण्यात आला आहे.
घटनेनंतर आरोपी कथितरित्या रोकड असलेले वाहन घेऊन खेड-शिवापूर पोलीस चौकीत पोहोचल्याची माहिती तपासात समोर आली आहे. याच ठिकाणी काही आर्थिक व्यवहार आणि वाटाघाटी झाल्याचा संशय व्यक्त केला जात आहे. या हालचाली परिसरातील एका हॉटेलच्या सीसीटीव्ही कॅमेऱ्यात कैद झाल्याचेही समोर आले आहे.
दरम्यान, जगड पोलीस ठाण्याचे पोलीस निरीक्षक संतोष जाधव यांनी चौकीला भेट दिल्यानंतर त्यांना या प्रकाराची माहिती मिळाली. त्यांनी संपूर्ण घटनेचा गोपनीय अहवाल तयार करून तो पुणे ग्रामीणचे पोलीस अधीक्षक संदीप सिंह गिल यांच्याकडे सादर केला. त्यानंतर या प्रकरणात तातडीने कारवाई करत संबंधित दोन्ही पोलिसांना निलंबित करण्यात आले.
या प्रकरणाचा तपास सुरू असून फरार आरोपींचा शोध घेण्यासाठी विविध पथके काम करत आहेत. तसेच या प्रकरणात आणखी कोणाचा सहभाग आहे का, याचाही तपास पोलीस करत आहेत.
