मुंबई: अमेरिकेचे अध्यक्ष डोनाल्ड ट्रम्प प्रवास करत असलेल्या ‘मरीन वन’ हेलिकॉप्टरशी संबंधित एक धक्कादायक घटना समोर आली आहे. हवाई वाहतूक नियंत्रणातील कथित त्रुटीमुळे ट्रम्प यांच्या हेलिकॉप्टरच्या अत्यंत जवळ एक प्रवासी विमान आले. सुदैवाने दोन्ही विमानांमध्ये धडक झाली नाही आणि मोठी दुर्घटना टळली. या घटनेनंतर अमेरिकेच्या विमान सुरक्षा व्यवस्थेवर पुन्हा प्रश्नचिन्ह उपस्थित झाले आहे.
माहितीनुसार, मंगळवारी दुपारी ट्रम्प यांचे ‘मरीन वन’ हेलिकॉप्टर व्हाईट हाऊसमधून उड्डाण करत होते. त्याचवेळी रिगन वॉशिंग्टन नॅशनल विमानतळावरून एका व्यावसायिक विमानानेही उड्डाण केले. दोन्ही विमाने काही काळ एकमेकांच्या धोकादायक अंतरावर आल्याने संबंधित यंत्रणांमध्ये एकच खळबळ उडाली.
या प्रकारानंतर फेडरल एव्हिएशन अॅडमिनिस्ट्रेशन (FAA) ने संपूर्ण घटनेची चौकशी सुरू केली आहे. प्राथमिक माहितीनुसार, हेलिकॉप्टरच्या उड्डाणापूर्वी इतर विमानांची हालचाल थांबवण्याची आवश्यक प्रक्रिया वेळेत पूर्ण झाली नसल्याची शक्यता व्यक्त केली जात आहे.
विशेष म्हणजे, रिगन विमानतळ परिसरात यापूर्वीही मोठी हवाई दुर्घटना घडली होती. जानेवारी 2025 मध्ये लष्करी हेलिकॉप्टर आणि प्रवासी विमानाची हवेत धडक होऊन 67 जणांचा मृत्यू झाला होता. त्यानंतर या भागात उड्डाणांबाबत कडक नियम लागू करण्यात आले होते.
FAA च्या नियमांनुसार, दोन विमानांमध्ये किमान 1.5 मैल म्हणजेच सुमारे 2.4 किलोमीटरचे अंतर आणि 500 फूट उंचीतील फरक असणे आवश्यक आहे. मात्र, या घटनेत ते नियम योग्य प्रकारे पाळले गेले का, याची चौकशी सुरू आहे.
