पुणे : दिवाळी आणि आगामी सणांच्या दिवसांत पुणे रेल्वे स्थानकावर प्रवाशांची होणारी तुफान गर्दी लक्षात घेता रेल्वे प्रशासनाने सुरक्षेची विशेष मोहीम हाती घेतली आहे. स्थानक परिसरात कोणताही अनुचित प्रकार घडू नये आणि प्रवाशांचा प्रवास सुरक्षित व्हावा, यासाठी रेल्वे सुरक्षा बल आणि लोहमार्ग पोलीस यांच्याकडून आधुनिक तंत्रज्ञानाचा वापर करून कडक बंदोबस्त तैनात करण्यात आला आहे.
सुरक्षा व्यवस्थेला अधिक मजबूत करण्यासाठी स्थानकावर आर्टिफिशियल इंटेलिजन्स (AI) आणि चेहरा ओळखणाऱ्या (Face Recognition) आधुनिक तंत्रज्ञानाने सज्ज असलेले 170 नवीन सीसीटीव्ही कॅमेरे बसवण्यात आले आहेत. स्थानकाचा परिसर, प्लॅटफॉर्म तसेच प्रवेशद्वारांवर या कॅमेऱ्यांद्वारे 24 तास बारकाईने लक्ष ठेवले जात आहे. संशयास्पद हालचाली किंवा गुन्हेगारी प्रवृत्ती आढळल्यास हे कॅमेरे सुरक्षा यंत्रणांना तत्काळ अलर्ट देतात.
प्रवाशांच्या सुरक्षेसाठी मुख्य प्रवेशद्वारांवर 17 डोअर फ्रेम मेटल डिटेक्टर आणि अत्याधुनिक बॅगेज स्कॅनरद्वारे प्रत्येक प्रवाशाची व त्यांच्या साहित्याची कडक तपासणी केली जात आहे. याशिवाय, रेल्वेचे यार्ड आणि रुळांजवळ होणारी घुसखोरी रोखण्यासाठी तसेच बाहेरील भागातील सुरक्षेचा आढावा घेण्यासाठी ड्रोनद्वारे हवाई गस्त घातली जात आहे.
दिवाळी आणि छठ पूजेसाठी गावी जाणाऱ्या प्रवाशांची गर्दी नियंत्रित करण्यासाठी स्थानक परिसरात 6,400 स्क्वेअर फूट जागेत विशेष तात्पुरता प्रतीक्षा कक्ष (‘होल्डिंग एरिया’) उभारण्यात आला आहे. यामुळे मुख्य प्लॅटफॉर्मवर एकदम गर्दी न होता प्रवाशांना तिथे बसून आराम करता येईल. प्रवाशांची कोणतीही अडचण होऊ नये म्हणून या परिसरात सर्व मूलभूत सुविधा पुरवण्यात आल्या आहेत. पोलीस प्रशासन आणि रेल्वे विभागाच्या या संयुक्त नियोजनामुळे यंदा पुणे स्थानकावरील सणासुदीचा प्रवास अधिक सुरक्षित आणि शिस्तबद्ध होणार आहे.
