पुणे : सिंहगड रस्त्यावरील गणेशमळा येथे मंगळवारी (दि. १२) सकाळी ७.४५ वाजता विद्युत अपघातामध्ये एका युवकाचा दुर्दैवी मृत्यू झाला. या प्रकरणी महावितरणच्या पर्वती विभागाकडून करण्यात आलेल्या प्राथमिक तपासणीमध्ये लघुदाब वाहिनीची तीन फेजपैकी एक वीजतार तुटून खाली पदपथावर लोंबकळत असल्याचे आढळून आले.
ही वीजतार तुटल्याक्षणीच फ्यूज गेला व तारेतील विद्युत प्रवाह देखील तात्काळ बंद झाला. मात्र वीजप्रवाह नसलेली ही तार अनधिकृत व्यक्तीने हटविण्याच्या किंवा ओढण्याच्या प्रयत्नामध्ये उर्वरित दोन फेजच्या तारांमधील वीज लोंबळकणाऱ्या तारेत प्रवाहीत झाली व त्याचा धक्का बसून दुर्दैवी प्राणांतिक अपघात झाला अशी शक्यता महावितरणने वर्तविली आहे.
या अपघातप्रकरणी महावितरणकडून राज्य शासनाच्या विद्युत निरीक्षक विभागाला कळविण्यात आले. संबंधित विद्युत निरीक्षकांनी अपघाताच्या ठिकाणाची पाहणी करून चौकशीला सुरवात केली आहे, असेही या संदर्भात जारी केलेल्या निवेदनात त्यांनी म्हटले आहे.
दरम्यान, प्राप्त झालेल्या चौकशी अहवालानुसार महावितरणकडून पुढील कार्यवाही करण्यात येणार आहे. तसेच मृत व्यक्तीच्या कुटुंबियास तातडीची २० हजार रुपयांची प्राथमिक आर्थिक मदत महावितरणकडून देण्यात येत असल्याचे महावितरणने कळविले आहे.
