पुणे : पुण्यातील पोलिस दलातील कर्मचाऱ्याचा नादच खुळा म्हणावा लागेल. त्याचे कारणही तसेच आहे. कारण बदली झालेल्या आपल्या साहेबाला त्याने चक्क हटके स्टाईलमध्ये शुभेच्छा दिल्या आहेत. यातून त्याने साहेबांना टोमणा हाणला आहे. सध्या हा मेसेज व्हायरल होत आहे. पेठेतील नागरिकांप्रमानेच पुणे पोलिस दलातील कर्मचारीही हजर जबाबी झाल्याचे पाहायला मिळत आहे.
पुण्यात शहाराअंतर्गत अनेक पोलिस ठाण्यातील पोलिस निरीक्षकांच्या बदल्या मंगळवारी करण्यात आल्या. यात खडक पोलिस ठाण्याचे वरिष्ठ पोलीस निरीक्षक म्हणून कार्यरत असणारे श्रीहरी बहिरट यांची भरती विद्यापीठ पोलिस ठाण्यात वरिष्ठ निरीक्षक म्हणून बदली करण्यात आली. त्यांच्या या बदलीवर खडक पोलीस ठाण्यातील एका पोलीस कर्मचाऱ्याने व्हॉट्सअपवर अनोख्या शुभेच्छा दिल्या आहेत.
काही दिवसांपूर्वी एका वरिष्ठ अधिकारी आणि कर्मचारी याचा बिर्याणीवरुन झालेल्या संवादाची ऑडिओ क्लिप व्हायरल झाली होती. त्या नंतर मासे खाण्यासाठी गावी जाण्यासाठी सुट्टी मागणारे पत्र व्हायरल झाले होते. त्यानंतर आता बदली झालेल्या पोलिस अधिकाऱ्याला एका पोलीस कर्मचाऱ्याने दिलेल्या हटके स्टाईल शुभेच्छा पुन्हा एकदा चर्चेत आल्या आहेत.
या कर्मचाऱ्याने केलेल्या मेसेजमध्ये म्हटले आहे की, तुम्ही तुपासह पाचही पक्वान्न खात होते. परंतु, इतरांना फक्त कोरडा भात खाऊ घालत होते. आता तुमची बदली झाली आहे. तुम्हाला शुभेच्छा असे म्हणत या कर्मचाऱ्याने त्यांच्या बदली बद्दल आनंद व्यक्त केला आहे. या सोबतच या कर्मचाऱ्याने पुढे म्हटले आहे की, साहेब मी तुम्हाला शुभेच्छा देऊ शकतच नाही, तुम्ही बदलून गेलात फार आनंद झाला याचं पण उत्तर लगेच देतो. एक तर आपण कोणालाच रजा सुट्ट्या देत नव्हते मी सरळ आणि प्रामाणिक काम करणारा साधा कर्मचारी होतो.
पण आपली एकच भूमिका खडक पोलीस स्टेशनच्या अधिकाऱ्यांना अथवा अंमलदारांना तुमचा स्वभाव आवडला नाही. तुम्ही तुपासह पाचही पक्वान्न खात होते, परंतु इतरांना फक्त कोरडा भात खाऊ घालत होते. त्यामुळे माझ्यासारख्या ज्येष्ठांचा आपल्या पाठीशी कायम आशीर्वाद राहील. आम्हाला म्हाताऱ्या लोकांना खूप त्रास दिला त्याचा तुमच्या बायका पोरांना आशीर्वाद मिळेल. कारण तुम्ही आम्हाला दिलेला त्रास आम्हाला झाला नसून, आमच्या बायका मुलांना झाला आहे. तरीपण पुढील वाटचालीसाठी हार्दिक शुभेच्छा साहेब..
