पुणे : राज्याचे दिवंगत उपमुख्यमंत्री अजित पवार यांच्या विमान दुर्घटनेमागील नेमके सत्य नागरिकांसमोर यावे, या मागणीसाठी आता थेट सरकारला प्रश्न विचारले जात आहेत. पुण्यातील कोथरूड भागात या प्रकरणाच्या संदर्भाने नव्याने फलक लावण्यात आले असून, त्यामुळे राजकीय वर्तुळात मोठी खळबळ उडाली आहे.

या फलकांच्या माध्यमातून प्रशासनाच्या आणि सरकारच्या कार्यपद्धतीवर गंभीर प्रश्नचिन्ह उपस्थित केले आहे. इतका मोठा विमान अपघात घडूनही या प्रकरणात अद्याप कोणतीही अधिकृत तक्रार दाखल झालेली नाही, अशी खंत या फलकांवर व्यक्त करण्यात आली आहे. याशिवाय, अपघाताच्या तपासात नेमकी काय प्रगती झाली, याची ठोस माहिती किंवा चौकशीचा अंतिम अहवालही अद्याप सार्वजनिक करण्यात आलेला नाही, याकडे या फलकांद्वारे लक्ष वेधण्यात आले आहे.
गेल्या काही दिवसांपासून पुणे आणि मुंबईत या दुर्घटनेवरून जोरदार पोस्टरबाजी सुरू असल्याचे पाहायला मिळत आहे. यापूर्वीही डेक्कन परिसरात ‘मफलरवाला नेता कोण?’ असा सवाल करणारे रहस्यमय फलक लागले होते. या विमान अपघाताचा तपास विविध तपास यंत्रणांकडून सुरू असला, तरी अंतिम अहवाल समोर न आल्याने संभ्रमाचे वातावरण निर्माण झाले आहे.

सध्या कोथरूडच्या मुख्य चौकांमध्ये लागलेले हे फलक येणाऱ्या-जाणाऱ्या नागरिकांचे लक्ष वेधून घेत आहेत. या दुर्घटनेमागील खरे कारण लपवले जात आहे का, असा संशय व्यक्त करत सर्वसामान्यांना सत्य समजण्याचा अधिकार आहे, अशी भावना या फलकांवरून मांडली गेली आहे. हे फलक नेमके कोणी लावले आहेत, याची अधिकृत माहिती अद्याप समोर आलेली नसली, तरी या निमित्ताने अजित पवार यांच्या विमान अपघाताचा मुद्दा पुन्हा एकदा ऐरणीवर आला आहे. या प्रकरणी सरकार आता काय भूमिका घेणार आणि तपासाची माहिती कधी समोर येणार, याकडे सर्वांचे लक्ष लागले आहे.






