राज्याचे सामाजिक न्यायमंत्री संजय शिरसाट यांनी अकोल्यातील एका कार्यक्रमात वादग्रस्त वक्तव्य केले आहे. यावेळी ते म्हणाले की, “सामाजिक न्यायभवनाच्या वसतिगृहासाठी तुम्ही 5, 10 किंवा 15 कोटी अशी कितीही रक्कम मागा, आपण लगेच मंजूर करू. सरकारचा पैसा आहे, आपल्या बापाचं काय जातंय?” या वक्तव्यामुळे राजकीय वर्तुळात नव्या वादाला तोंड फुटले आहे.
राज्यात मंत्र्यांच्या वादग्रस्त वक्तव्यांमुळे सरकारची गोची होत असतानाच, संजय शिरसाट यांचं वक्तव्य चांगलंच चर्चेत आले आहे. त्यांच्या या विधानावर अनेक नेते टीका करत आहेत.
संजय शिरसाट यांच्या वक्तव्यावर राष्ट्रवादी काँग्रेस (शरद पवार गट) च्या खासदार सुप्रिया सुळे यांनी टीका करत म्हटले आहे की, “मुख्यमंत्र्यांनी तंबी देऊनही मंत्र्यांची वादग्रस्त विधाने थांबत नाहीत. ही बाब गंभीर आहे.” सुप्रिया सुळे यांनी शिरसाट यांच्या वक्तव्यावर नाराजी व्यक्त करत सरकारच्या पैशाबाबत जबाबदारीने बोलण्याची गरज असल्याचे म्हंटले आहे.
दुसरीकडे राष्ट्रवादीचे आमदार रोहित पवार यांनीही सोशल मीडियावर शिरसाट यांचा व्हिडीओ शेअर करत टीका केली. ते म्हणाले की, “शिरसाट साहेब, पैसा तुमच्या घरचा नसला तरी तो जनतेचा आहे. तुम्ही फक्त विश्वस्त आहात. त्यामुळे उधळपट्टी करण्याचा अधिकार कुणालाही नाही.”
दरम्यान, आता सरकारमधील मंत्र्यांच्या वक्तव्यांवरून पुन्हा एकदा वाद निर्माण झाला आहे. यापूर्वीही मंत्र्यांची अशी वक्तव्ये चर्चेत आली असून, विरोधकांनी सरकारवर निशाणा साधला आहे.
