नवी दिल्ली: कामाच्या व्यापात, प्रवासात किंवा सार्वजनिक ठिकाणी स्वच्छतागृह उपलब्ध नसल्यामुळे अनेकदा लोक लघवी रोखून ठेवतात. ही सवय सुरुवातीला किरकोळ वाटत असली तरी आरोग्यावर गंभीर परिणाम करू शकते. तज्ज्ञांच्या मते, लघवी रोखून ठेवणे ही एक धोकादायक सवय असून, यामुळे शरीरातील विषारी घटक बाहेर पडण्यास अडथळा निर्माण होतो आणि काही गंभीर आजारांची शक्यता वाढते.
चला पाहूया, लघवी रोखून ठेवण्याने कोणते आजार होऊ शकतात
1. किडनी स्टोनचा धोका
लघवीमध्ये नैसर्गिकरित्या युरिक अॅसिड आणि कॅल्शियम ऑक्सलेट असते. जेव्हा लघवी वेळेत बाहेर टाकली जात नाही, तेव्हा हे द्रव्य मूत्रमार्गात साचून राहते आणि मूत्रपिंडात खडे (स्टोन) तयार होण्याचा धोका वाढतो.
2. मूत्रमार्गाचा संसर्ग (UTI)
लघवी रोखल्यामुळे मूत्राशयात बॅक्टेरियांचे प्रमाण वाढू शकते. हे बॅक्टेरिया संसर्ग निर्माण करतात. विशेषतः महिला, मधुमेही रुग्ण, आणि न्यूरोलॉजिकल समस्या असलेल्या व्यक्तींना याचा धोका अधिक असतो.
3. मूत्र गळती (Urinary Incontinence)
दीर्घकाळ लघवी रोखल्यास मूत्राशयाचे स्नायू कमकुवत होतात. यामुळे वयोमानानुसार लघवीवर नियंत्रण ठेवणे कठीण होते आणि अनपेक्षित गळती होऊ शकते.
4. मूत्रपिंडाचे आजार
मूत्र रोखल्याने मूत्राशयावर आणि मूत्रपिंडावर अतिरिक्त दबाव येतो. हे किडनी फंक्शन वर परिणाम करू शकते. यामुळे दुखणे, जळजळ आणि किडनी डॅमेज यासारख्या समस्या उद्भवू शकतात.
काय करावे?
1) वेळोवेळी लघवी करणे ही सवय लावा.
2) पाणी भरपूर प्या जेणेकरून लघवी नियमितपणे होईल.
3) शक्य असल्यास, स्वच्छतागृहाच्या सुविधांचा शोध घ्या किंवा प्रवासात तत्सम उपाय ठेवा.
टीप: सदर माहिती वाचकांसाठी पुरवण्यात आली आहे. ‘पुणे प्राईम न्यूज’ यातून कोणताही दावा करीत नाही.
