पुणे, ता. ३० : साहित्यसम्राट लोकशाहीर डॉ. अण्णा भाऊ साठे यांच्या १०६ व्या जयंतीनिमित्त पुणे शहर जिल्हा मातंग समाज व साहित्यसम्राट डॉ. अण्णा भाऊ साठे जयंती महोत्सव समितीच्या वतीने ३१ जुलै ते १ ऑगस्ट २०२६ या कालावधीत विविध सामाजिक, सांस्कृतिक आणि प्रबोधनात्मक कार्यक्रमांचे आयोजन करण्यात आले आहे. या जयंती महोत्सवाच्या मुख्य कार्यक्रमाला मुख्यमंत्री देवेंद्र फडणवीस, उपमुख्यमंत्री एकनाथ शिंदे आणि उपमुख्यमंत्री सुनेत्राताई अजित पवार उपस्थित राहणार असल्याची माहिती स्वागताध्यक्ष अनिल हातागळे आणि सचिव अॅड. महेश सकट यांनी दिली.
दरवर्षीप्रमाणे यंदाही अण्णा भाऊ साठे यांच्या विचारांचा जागर करण्यासाठी विविध उपक्रमांचे आयोजन करण्यात आले आहे. ३१ जुलै रोजी सायंकाळी गुणवंत विद्यार्थी सत्कार तसेच समाजातील विविध क्षेत्रात उल्लेखनीय कार्य करणाऱ्या व्यक्तींचा गौरव करण्यात येणार आहे. या कार्यक्रमाला प्र. कुलगुरू डॉ. पराग काळकर, पोलिस उपायुक्त मिलिंद मोहिते आणि विवेक वेलणकर प्रमुख पाहुणे म्हणून उपस्थित राहणार आहेत.
मुख्य जयंती सोहळा शनिवार, १ ऑगस्ट रोजी सायंकाळी ५ वाजता सारसबाग येथील साहित्यसम्राट लोकशाहीर डॉ. अण्णा भाऊ साठे यांच्या पुतळ्यासमोर पार पडणार आहे. कार्यक्रमाच्या अध्यक्षस्थानी पुण्याच्या महापौर मंजुषाताई नागपुरे राहणार असून स्वागताध्यक्ष अनिल हातागळे उपस्थित राहतील. प्रा. सुहास नाईक, प्रा. धनंजय झोंबाडे आणि विश्वजित मोरे हे प्रमुख वक्ते म्हणून मार्गदर्शन करणार आहेत.
या सोहळ्यास मुख्यमंत्री देवेंद्र फडणवीस, उपमुख्यमंत्री एकनाथ शिंदे, उपमुख्यमंत्री सुनेत्राताई अजित पवार, आमदार सुनील कांबळे, माजी राज्यमंत्री रमेश बागवे यांच्यासह राज्यातील अनेक मंत्री, खासदार, आमदार, लोकप्रतिनिधी, विविध पक्षांचे पदाधिकारी आणि सामाजिक क्षेत्रातील मान्यवर उपस्थित राहणार असल्याचे आयोजकांनी सांगितले.
यावेळी ‘साहित्यसम्राट लोकशाहीर डॉ. अण्णा भाऊ साठे समाजभूषण पुरस्कार’ माजी राज्यमंत्री दिलीप कांबळे आणि विधान परिषद सदस्य अमित गोरखे यांना प्रदान करण्यात येणार आहे. तसेच ‘वीर लढवय्या फकिरा पुरस्कार’ दुर्गेश महादेव हातागळे आणि दिगंबर जोगदंड यांना, तर ‘सत्यशोधक मुक्ता साळवे पुरस्कार’ कु. कोमल एकनाथ शिंदे यांना प्रदान करण्यात येणार आहे.
अण्णा भाऊ साठे यांच्या समता, शिक्षण, समाजप्रबोधन आणि सामाजिक न्यायाच्या विचारांचा प्रसार करण्याच्या उद्देशाने या जयंती महोत्सवाचे आयोजन करण्यात आले असून, पुणे शहर व परिसरातील नागरिकांनी मोठ्या संख्येने उपस्थित राहून कार्यक्रम यशस्वी करावा, असे आवाहन स्वागताध्यक्ष अनिल हातागळे आणि सचिव अॅड. महेश सकट यांनी केले आहे.
