पुणे: अमेडिया जमीन खरेदी गैरव्यवहार प्रकरणाचा तपास वेगाने सुरू असताना निलंबित सह दुय्यम निबंधक रविंद्र बाळकृष्ण तारू (वय 58) यांना बावधन पोलिसांनी अटक केली आहे. पार्थ पवार यांच्या अमेडिया इंटरप्रायजेस एलएलपी कंपनीशी संबंधित जमीन व्यवहारात नियमबाह्यरीत्या दस्त नोंदणी केल्याचा आरोप त्यांच्यावर आहे. (Ravindra Taru arrested)
या प्रकरणातील मुख्य आरोपी शीतल किशनचंद तेजवाणी हिला यापूर्वीच पोलिसांनी अटक केली असून तिची चौकशी सुरू आहे. तिच्या विधानांच्या आधारे आणि दस्तऐवजांच्या तपासात रविंद्र तारू यांनीच संबंधित जमिनीचा खरेदी दस्त नोंदविल्याचे स्पष्ट झाले, त्यानंतर त्यांना त्यांच्या भोर येथील घरातून ताब्यात घेण्यात आले आहे.
जमीन गैरव्यवहार प्रकरण काय?
उपमुख्यमंत्री अजित पवार यांचे पुत्र पार्थ पवार यांच्या भागीदारी असलेल्या अमेडिया इंटरप्रायजेस LLP चे भागीदार दिग्विजय अमरसिंह पाटील यांनी पुण्यातील मुंढवा येथील जमिनीच्या खरेदी–विक्री प्रक्रियेत शासनाला देय असलेले सुमारे सहा कोटी रुपयांचे मुद्रांक शुल्क न भरल्याचा आरोप आहे.
6 नोव्हेंबर रोजी बावधन पोलिस ठाण्यात या प्रकरणी गुन्हा नोंदवण्यात आला. सह जिल्हा निबंधक (वर्ग 1) संतोष हिंगाणे यांनी फिर्याद दिली. तपासात तिघांचेही संगनमत दिसूनआल्याने शीतल तेजवाणी, दिग्विजय पाटील आणि रविंद्र बाळकृष्ण तारू यांच्यावर गुन्हा दाखल करण्यात आला आहे.
शासनाच्या नियमानुसार या जमिनीच्या व्यवहारासाठी 5,89,31,800 इतके मुद्रांक शुल्क भरणे आवश्यक होते. मात्र संशयितांनी शुल्क न भरता फसवणूक केल्याचे आढळले आहे.
पिंपरी–चिंचवड पोलिसांनी रविंद्र तारू यांना भोरमधील राहत्या घरातून अटक केल्याची माहिती पोलिस उपायुक्त विशाल गायकवाड यांनी माध्यमांना दिली. या प्रकरणातील दस्तऐवज, आर्थिक व्यवहार आणि आरोपींमधील संगनमत याबाबतचा तपास सुरू असून आणखी काही जणांवरही कारवाईची शक्यता व्यक्त केली जात आहे.
