Private Bus Instructions : नागपूर : आता खासगी बसमध्येही विमानासारखा प्रवास करत असल्याचा अनुभव घेता येणार आहे. राज्य परिवहन विभागाने या संदर्भातील महत्त्वाचा निर्णय घेतला आहे. राज्यात रस्ते अपघाताच प्रमाण दिवसेंदिवस वाढ चाललं आहे. त्याला आळा घालण्यासाठी आणि प्रवाशांची सुरक्षितता वाढण्यासाठी हा निर्णय घेण्यात आला आहे. स्लीपर बसचे अपघात रोखणे आणि आपत्कालीन प्रसंगी जीवितहानी टाळण्यासाठी उपाययोजना व सूचना जारी करण्यात आल्या आहेत. त्यानुसार बसचा आपत्कालीन दरवाजा सुस्थितीत असणे आवश्यक आहे.
आपात्कालीन परिस्थितीची घोषणा
यामध्ये बसच्या पुढच्या भागात बस चालकाचा फोटो, बस चालकाचा मोबाईल क्रमांक, बस कंपनीचा फोन नंबर, बसच्या फिटनेस संदर्भातली माहिती लावणे बंधनकारक राहणार आहे. एवढंच नाही तर विमान प्रवासात ज्या पद्धतीने एअर होस्टेस आपात्कालीन परिस्थितीत प्रवाशांनी काय करावे याची सूचना प्रवाशांना देते. तशाच पद्धतीच्या सूचना बस प्रवास सुरू होण्याआधी प्रवाशांना देणे बंधनकारक करण्यात आले आहे. नागपूरचे सहाय्यक प्रादेशिक परिवहन अधिकारी हर्षल डाके यांनी दिली आहे.
खासगी बसच्या दुर्घटनेत वाढ
जास्तीचे भाडे देऊन प्रवास सुखकर होण्याकडे नागरिकांचा कल असतो. त्यामुळे नागरिक खासगी बसला पसंती देतात. मात्र याच बसच्या दुर्घटनेत सध्या वाढ झाली आहे. खासगी बसचा प्रवास प्रवाशांच्या जीवावर बेतत असल्याचं चित्र आहे. या पार्श्वभूमीवर हा निर्णय घेण्यात आला आहे.
सणांच्या सिजनमध्ये लूट थांबवण्यासाठी निर्णय
सणांच्या काळात एसटीच्या भाड्यापेक्षादीडपट भाडं खाजगी बस घेतात. नियमीत भाड्यापेक्षा जास्त भाडे घेतल्यास खाजगी ट्रॅव्हल्स विरोधात कठोर कारवाई केली जाणार आहे. अशी सूचनाही परिवहन विभागाकडून करण्यात आली आहे. खाजगी बसेस आणि ट्रॅव्हल्सला भाडे निश्चिती मोटार ॲक्टनुसार करण्यात आले असून ते एसटी भाड्यापेक्षा 50 टक्के अधिक आहे. म्हणजेच जे एसटीचे भाडे 200 असेल तर तिकीट हे तीनशे रुपये खाजगी बस चालकांना घेता येते.
