लोणी काळभोर : पुणे -सोलापूर राष्ट्रीय महामार्गावर बस व दुचाकीचा अपघात झाल्याची घटना घडली आहे. ही घटना कदमवाकवस्ती (ता. हवेली) ग्रामपंचायत हद्दीतील कवडीरस्ता चौकात सोमवारी (ता. 14) दुपारी सव्वा तीन वाजण्याच्या सुमारास घडली आहे. या अपघातात दुचाकीस्वार गंभीर जखमी झाला आहे. तर या अपघाताचा व्हिडीओ सोशल मिडीयावर व्हायरल झाला आहे.
सचिन मधुकर जाधव (वय-22 रा, बाजारमळा, लोणी काळभोर, ता. हवेली) असे जखमी झालेल्या तरुणाचे नाव आहे. मिळालेल्या माहितीनुसार, सचिन जाधव हे दुचाकीवरून कवडीरस्ता चौक ओलांडत होते. तेव्हा पुण्याकडून सोलापूरच्या दिशेने जाणाऱ्या भरधाव बसने त्यांच्या दुचाकीला जोरदार धडक दिली. या अपघातात 40 ते 50 फुट अंतर दुचाकी घसरत गेली. या अपघातात सचिन जाधव हा गंभीर जखमी झाला आहे.
View this post on Instagram
याबाबतची खबर मंगेश कसबे यांनी शिवम हॉस्पिटलमध्ये दिली आहे. त्यानंतर रुग्णवाहिका त्वरित घटनास्थळी दाखल झाली. नागरिकांनी जखमी सचिन जाधवला रुग्णवाहिकेत उचलून ठेवले. शिवम हॉस्पिटलमध्ये सचिनवर उपचार सुरु आहेत. त्यानंतर शिवम हॉस्पिटलने या अपघाताची माहिती लोणी काळभोर पोलिसांना दिली.
दरम्यान, या घटनेची माहिती मिळताच, लोणी काळभोर पोलीस ठाण्याचे पोलीस हवालदार केतन धेंडे तातडीने हॉस्पिटलमध्ये दाखल झाले. तेव्हा अपघातात जखमी झालेल्या सचिन जाधववर उपचार सुरु असून त्यांची प्रकृती गंभीर आहे. सचिन हे बेशुद्धावस्थेत असल्याने त्यांचा जबाब घेण्यात आलेला नाही.
