पुणे : पुण्यातील जांभूळवाडी दरी पुलाजवळ मुंबई-बंगळूर महामार्गावर शनिवारी मध्यरात्री 12:30 वाजण्याच्या सुमारास एक अत्यंत भीषण दुर्घटना घडली. चार वाहनांच्या या विचित्र अपघातामध्ये 2 प्रवाशांना आपला जीव गमवावा लागला, तर 12 जण गंभीर जखमी झाले आहेत.
मिळालेल्या माहितीनुसार, साताऱ्याहून मुंबईच्या दिशेने जाणाऱ्या एका ट्रकचालकाचे (प्रमोद विठ्ठल वाघ) वाहनावरील नियंत्रण अचानक सुटले. अनियंत्रित झालेला हा ट्रक पुढे चाललेल्या आयशर ट्रकला जाऊन धडकणारा ठरला. ही धडक एवढी जोरदार होती की दोन्ही ट्रक रस्त्याचा दुभाजक तोडून थेट विरुद्ध दिशेला म्हणजेच साताऱ्याकडे जाणाऱ्या मार्गावर आले. त्याच क्षणी समोरून येणाऱ्या अर्टिगा आणि टाटा अल्ट्रोझ या दोन मोटारींना या ट्रकांनी जोरदार धडक दिली, ज्यामुळे या चारही वाहनांचा भीषण अपघात झाला.
या दुर्घटनेत टाटा अल्ट्रोझ कारमधील आनंदीबाई रामचंद्र वाडकर (वय 50, रा. नेरूळ, नवी मुंबई) आणि हृदयनाथ मोहन गायकवाड (रा. जोगेश्वरी पूर्व, मुंबई) या दोघांचा घटनास्थळीच मृत्यू झाला. गाड्यांमधील इतर 12 जण अपघातात जखमी झाले असून, त्यांना तातडीने उपचारासाठी जवळच्या रुग्णालयात दाखल करण्यात आले आहे.
या अपघाताची बातमी समजताच आंबेगाव पोलीस स्टेशन, भारती विद्यापीठ वाहतूक शाखा आणि अग्निशमन दलाचे जवान मदतीसाठी धावून आले. महामार्गाच्या मध्योभागी वाहने अडकल्याने काही वेळ गाड्यांची मोठी रांग लागली होती. क्रेनच्या मदतीने अपघातग्रस्त वाहने बाजूला हलवल्यानंतर वाहतूक पूर्ववत करण्यात आली. या प्रकरणाचा पुढील तपास पोलीस करत आहेत.
