पुणे : डिजिटल पेमेंट वापरणाऱ्या युझर्सच्या सुरक्षेसाठी राष्ट्रीय देयके महामंडळाने एक महत्त्वपूर्ण पाऊल उचलले आहे. PhonePe, Google Pay आणि Paytm सारख्या सर्व युपीआय ॲप्सना युझर्सची वैयक्तिक माहिती सुरक्षित ठेवण्याचे स्पष्ट आदेश देण्यात आले आहेत.
नव्या नियमामुळे काय बदलणार?
मोबाईल नंबर लपवला जाणार: आता कोणत्याही दुकानात किंवा अनोळखी ठिकाणी क्यूआर (QR) कोड स्कॅन करून पैसे पाठवल्यास, प्राप्तकर्त्याला तुमचा पूर्ण मोबाईल नंबर दिसणार नाही.
शेवटचे ४ अंकच दिसणार: सुरक्षा म्हणून युझर्सच्या मोबाईल क्रमांकाचे फक्त शेवटचे ४ अंक दिसतील.
खासगी माहिती सुरक्षित: युझर्सचे नाव, युपीआय आयडी (UPI ID) आणि बँक खात्याची माहिती लपवून (Masking) ठेवली जाईल.
पेमेंटवर परिणाम नाही: या बदलामुळे तुमच्या दैनंदिन व्यवहारांवर किंवा पेमेंट प्रक्रियेवर कोणताही विपरीत परिणाम होणार नाही; फक्त पेमेंट यशस्वी झाल्याचा मेसेज समोरच्याला दिसेल.
आजकाल लहान-मोठ्या सर्वच व्यवहारांसाठी युपीआयचा वापर मोठ्या प्रमाणावर होतो. मात्र, अनोळखी व्यक्तींकडे थेट मोबाईल नंबर जात असल्याने त्याच्या गैरवापराच्या अनेक तक्रारी समोर आल्या होत्या. विशेषतः महिलांच्या सुरक्षेचा आणि गोपनीयतेचा (Privacy) प्रश्न निर्माण झाला होता. या सर्व बाबी लक्षात घेऊन डिजिटल डेटा सुरक्षेच्या दृष्टीने NPCI ने हा महत्त्वाचा निर्णय घेतला आहे.
NPCI ने सर्व बँका आणि युपीआय ॲप्सना 4 सप्टेंबर 2026 पर्यंत या नवीन नियमांची अमलबजावणी करण्याचे निर्देश दिले आहेत. या निर्णयामुळे भारतातील लाखो डिजिटल युझर्सचा डेटा अधिक सुरक्षित होण्यास मदत होईल.
