पुणे : पुण्यातील स्पर्धा परीक्षा विद्यार्थ्यांनी केलेल्या तीव्र आंदोलनानंतर महाराष्ट्र लोकसेवा आयोगात मोठे प्रशासकीय बदल करण्यात आले आहेत. आयोगाचे सचिव महेंद्र हरपाळकर यांच्या बदलीची मागणी विद्यार्थ्यांनी लावून धरली होती. त्यानंतर आता त्यांच्या जागी 2014 च्या बॅचचे अधिकारी सौरभ कटियार यांची नवीन सचिव म्हणून नियुक्ती करण्यात आली आहे.
मूळचे उत्तर प्रदेशच्या कानपूरमधील मिरगावचे असलेले सौरभ कटियार यांनी आपली शैक्षणिक वाटचाल अत्यंत प्रेरणादायी ठेवली आहे. त्यांनी आयआयटी कानपूरमधून बीटेक आणि एमटेकचे शिक्षण पूर्ण केले. विशेष म्हणजे, कोणतीही खाजगी क्लास किंवा कोचिंग न घेता त्यांनी जिद्दीच्या बळावर युपीएससी परीक्षेत 334 वा क्रमांक मिळवला आणि त्यांची आयकर सेवेत निवड झाली. नागपूर येथे त्यांनी आयकर विभागात प्रशिक्षण घेतले होते. आता त्यांच्यावर MPSC च्या सचिवपदाची अतिरिक्त जबाबदारी सोपवण्यात आली आहे.
दुसरीकडे, MPSC च्या कारभारावर आक्षेप घेत विद्यार्थ्यांनी पुण्यात मोठे आंदोलन उभारले होते. या आंदोलनाची दखल घेत अखेर शासनाला नमावे लागले. विद्यार्थ्यांच्या तीव्र रोषाखातर आयोगाचे अध्यक्ष विवेक भीमनवार यांना सक्तीच्या रजेवर पाठवण्यात आल्याची माहिती सार्वजनिक बांधकाममंत्री शिवेंद्रसिंहराजे भोसले यांनी दिली होती.
आता महेंद्र हरपाळकर यांच्या जागेवर सौरभ कटियार यांची वर्णी लागली असली, तरी सक्तीच्या रजेवर गेलेल्या विवेक भीमनवार यांचा अतिरिक्त कार्यभार नेमका कोणाकडे सोपवला जाणार, याबाबत अद्याप उत्सुकता कायम आहे. यापूर्वी वर्तुळात सतीश देशपांडे यांच्या नावाची जोरदार चर्चा होती, मात्र शासनाने कटियार यांच्या नावावर शिक्कामोर्तब केले आहे. विद्यार्थ्यांच्या या आंदोलनामुळे MPSC च्या कामकाजात पारदर्शकता आणण्यासाठी प्रशासकीय पातळीवर मोठे फेरबदल केले जात आहेत.
