Rule Change : पुणे, : मे महिन्याचा आज शेवटचा दिवस असून उद्यापासून म्हणजेच १ जूनपासून देशभरात अनेक महत्त्वाचे आर्थिक बदल लागू होणार आहेत. या बदलांचा थेट परिणाम सर्वसामान्यांच्या दैनंदिन खर्चावर, बँकिंग व्यवहारांवर आणि वाहन खरेदीवर होणार आहे. एलपीजी सिलेंडरच्या किमतींपासून ते पेट्रोल-डिझेलवरील शुल्क, बँकिंग नियम आणि कारच्या वाढलेल्या किमतींपर्यंत अनेक बदलांची अंमलबजावणी होणार आहे.
१) एलपीजी सिलेंडरच्या किमतीत बदलाची शक्यता
दर महिन्याच्या पहिल्या तारखेला तेल कंपन्या एलपीजी सिलेंडरचे नवे दर जाहीर करतात. त्यामुळे १ जून रोजी घरगुती आणि व्यावसायिक गॅस सिलेंडरच्या किमतीत बदल होण्याची शक्यता आहे. याशिवाय, पीएनजी आणि एलपीजी दोन्ही कनेक्शन असलेल्या ग्राहकांची पडताळणी करण्यात येत असून नियमांचे पालन न केल्यास एलपीजी कनेक्शन रद्द होण्याची शक्यता व्यक्त केली जात आहे.
२) पेट्रोल, डिझेल आणि एटीएफवर नवे शुल्क
१ जूनपासून पेट्रोल, डिझेल आणि एअर टर्बाइन फ्युएल (ATF) यांच्यावरील निर्यात शुल्कात बदल होणार आहे. याचा परिणाम इंधन क्षेत्रासह हवाई प्रवासाच्या खर्चावरही होऊ शकतो. त्यामुळे बाजारातील इंधन दरांवर सर्वांचे लक्ष लागले आहे.
३) एचडीएफसी बँकेच्या नियमांमध्ये बदल
एचडीएफसी बँकेने चालू खातेधारकांसाठी लहान नोटा आणि नाण्यांच्या रोख ठेवींवर नवीन मर्यादा आणि शुल्क लागू करण्याचा निर्णय घेतला आहे. ठराविक मर्यादेपेक्षा अधिक रक्कम जमा केल्यास अतिरिक्त शुल्क आकारले जाणार आहे. त्यामुळे व्यापारी आणि व्यावसायिक ग्राहकांनी नव्या नियमांची माहिती घेणे आवश्यक आहे.
४) सौर पॅनेलसाठी नवे निकष
१ जूनपासून सौर पॅनेल क्षेत्रात ‘ALMM List-II’ लागू होणार आहे. सरकारी योजना आणि अनुदानित प्रकल्पांमध्ये केवळ मान्यताप्राप्त उत्पादकांची उत्पादने वापरणे बंधनकारक राहणार आहे. यामुळे सौर उपकरणांच्या किमतींमध्ये वाढ होण्याची शक्यता वर्तवली जात आहे.
५) मारुतीच्या गाड्या महागणार
कार खरेदीचा विचार करणाऱ्यांसाठीही धक्का आहे. मारुती सुझुकीने आपल्या विविध मॉडेल्सच्या किमती वाढवण्याची घोषणा केली असून १ जूनपासून या नव्या किमती लागू होणार आहेत. काही मॉडेल्सच्या किमतीत तब्बल ३० हजार रुपयांपर्यंत वाढ होणार आहे.
दरम्यान, एकूणच, १ जूनपासून लागू होणारे हे बदल सर्वसामान्यांच्या खर्चावर परिणाम करणारे ठरणार असून नागरिकांनी नव्या नियमांची माहिती घेऊन आर्थिक नियोजन करणे आवश्यक आहे.
