फुरसुंगी : जमीन मोजणी करून देण्याचे आश्वासन देत एका व्यक्तीने सेवानिवृत्त पोलिसाची तब्बल 91 हजार 710 रुपयांची आर्थिक फसवणूक केल्याचा प्रकार उरुळी देवाची (ता. हवेली) परिसरात समोर आला आहे. मोजणीच्या नावाखाली पैसे घेतल्यानंतर प्रत्यक्षात कोणताही अर्ज किंवा चलन भरले नसल्याचे समोर आल्यानंतर फसवणूक झाल्याचे लक्षात आले. पैसे परत करण्यासाठी दिलेले दोन धनादेशही वटले नसल्याचा प्रकार समोर आला आहे.
याप्रकरणी धर्मराज शंकर जाधव (वय 65, रा. मारुंजी, मुळशी) यांनी फुरसुंगी पोलिस ठाण्यात तक्रार दिली आहे. त्यानुसार राहुल उत्तम पठारे (रा. होळकरवाडी, ता. हवेली) याच्याविरोधात गुन्हा दाखल करण्यात आला आहे. पोलिसांनी दिलेल्या माहितीनुसार, फिर्यादी जाधव हे पोलिस खात्यातून 2019 मध्ये सेवानिवृत्त झाले आहेत.
जाधव हे उरुळी देवाची तलाठी कार्यालयात त्यांच्या जमिनीच्या पोटहिस्सा मोजणीसाठी आवश्यक कागदपत्रे घेण्यासाठी 14 नोव्हेंबर 2025 रोजी गेले होते. त्यावेळी राहुल पठारे याने आपण यापूर्वी अनेक मोजणी अधिकाऱ्यांसोबत काम केले असून, ओळखीच्या माध्यमातून 15 दिवसांत जमीन मोजणी करून देण्याचे आश्वासन दिले.
या आश्वासनावर विश्वास ठेवून जाधव यांनी 14 ते 26 नोव्हेंबरदरम्यान विविध कारणांसाठी पठारे याच्या बँक खात्यावर एकूण 91 हजार 710 रुपये ऑनलाइन पाठविले. मात्र, त्यानंतर वारंवार तारीख सांगूनही प्रत्यक्ष मोजणी झाली नाही. मोजणी कार्यालयात चौकशी केली असता जाधव यांच्या नावाने कोणताही मोजणी अर्ज किंवा चलन भरलेले नसल्याचे समोर आले. त्यामुळे आपली फसवणूक झाल्याचे त्यांच्या लक्षात आले. त्यानंतर पठारे याने पैसे परत करण्याचे आश्वासन देत 50 हजार आणि 41 हजार रुपयांचे दोन धनादेश दिले. मात्र, दोन्ही धनादेश वटले नाहीत.
पैसे व कागदपत्रांची मागणी केल्यावर पठारे याने वारंवार घरी येऊ नका, अन्यथा जीव देईन, अशी धमकी फिर्यादी जाधव यांना दिली आहे. तसेच जाधव यांच्या जमिनीवरील नावाचा फलक तोडून नुकसान केल्याचेही तक्रारीत नमूद करण्यात आले आहे. या प्रकरणी फुरसुंगी पोलिस ठाण्यात पठारे यांच्यावर भारतीय न्याय संहिता (बी एन एस), 2023 – 316(2),318(4),324(4),351(2) प्रमाणे गुन्हा दाखल करण्यात आला आहे.
