Pune News : पुण्यातील प्रतिष्ठित आयटी अभियंता दीपक डोळस आणि त्यांच्या शिक्षक पत्नीला सुमारे १४ कोटी रुपयांना फसवल्याप्रकरणी आता पीडित कुटुंबाला मोठा दिलासा मिळाला आहे. या फसवणूक प्रकरणातील मुख्य आरोपी, स्वतःला मांत्रिक म्हणवणारी वेदिका पंढरपूरकर, हिने डोळस दांपत्याचे लुबाडलेले सर्व पैसे परत करण्याची तयारी दर्शवली आहे. न्यायालयाच्या धाकाने आरोपीने घेतलेल्या या भूमिकेमुळे, ४ डिसेंबर २०२५ रोजी पुणे न्यायालयात या संदर्भात अधिकृत प्रतिज्ञापत्र सादर केले जाणार आहे.
या फसवणुकीच्या गुन्ह्यात वेदिका पंढरपूरकरसह तिचा पती कुणाल पंढरपूरकर आणि तिचा गुरु दीपक खडके यांचा समावेश आहे. आरोपींनी २०१८ सालापासून डोळस कुटुंबाचा विश्वास संपादन केला. त्यांच्या दोन्ही मुलींना आजार असल्याचे पाहून आरोपींनी, ‘शंकर महाराज’ आपल्या अंगात येतात आणि ते तुमच्या मुलींना बरे करतील, अशी बतावणी केली.
या अंधश्रद्धेच्या जाळ्यात ओढल्यानंतर आरोपींनी डोळस दांपत्याला सांगितले की, त्यांच्याकडे संपत्ती ठेवल्यास घरात दोष निर्माण होतील. याच भीतीचा फायदा घेत, दीपक डोळस यांना त्यांची आयुष्यभराची जमापुंजी आणि मालमत्ता विकण्यास भाग पाडण्यात आले. यात त्यांनी परदेशात (इंग्लंड) नोकरी करत असताना खरेदी केलेले घर आणि फार्म हाऊस तसेच पुण्यातील प्लॉट आणि फ्लॅट विकायला लावले. या सर्व मालमत्ता विकून आलेले तब्बल १४ कोटी रुपये आरोपींनी आरटीजीएस (RTGS) द्वारे स्वतःच्या बँक खात्यात वळते करून घेतले होते.
फसवणूक झाल्याचे लक्षात आल्यानंतर डोळस दांपत्याने पोलिसांत धाव घेतली. पुणे पोलिसांनी तिन्ही आरोपींना तात्काळ अटक केली असून, त्यानंतर न्यायालयाने त्यांचा जामीन अर्ज वेळोवेळी फेटाळला आहे. न्यायालयीन कोठडीत असतानाच, आता वेदिका पंढरपूरकर हिने सर्व पैसे परत करण्याची तयारी दर्शवली आहे. यामुळे डोळस दांपत्याला त्यांचा गमावलेला पैसा परत मिळण्याची आशा निर्माण झाली आहे. आज न्यायालयात सादर होणाऱ्या प्रतिज्ञापत्रात आरोपींनी नेमके काय आश्वासन दिले आहे, याकडे सर्वांचे लक्ष लागले आहे.
