प्रतिनिधी,अमित मुंडीक
Pune News : श्रीजी सिरॅमिक दुकानाजवळ धारदार शस्त्राचा धाक दाखवत 3 लाख 80 हजार रुपयांची लूट करणाऱ्या टोळीला गुंडा विरोधी पथकाने अटक केली आहे. 2 डिसेंबर रोजी रात्री हा प्रकार घडला.
आशिष अरजनमा बुवा हे दुकानासमोर थांबले असताना चार अनोळखी तरुणांनी त्यांच्या अंगावर धाव घेत कोयत्यासह धारदार हत्त्याराने हल्ला केला. बुवांना जखमी करून त्यांच्या ताब्यातील रोख रकमेची बॅग आरोपींनी हिसकावली. परिसरात दहशत माजवून आरोपी पळून गेले. या प्रकरणी चिंचवड पोलीस ठाण्यात गुन्हा क्रमांक 516/2025 नोंदविण्यात आला आहे.
घटनेनंतर पोलिस आयुक्त विनयकुमार चौबे यांच्या आदेशानुसार गुन्हे शाखेच्या गुंडा विरोधी पथकाने स्वतंत्र तपास पथक तयार केले. सहा. पोलीस निरीक्षक एच. व्ही. माने, पोउपनि समीर लोंढे यांनी सीसीटीव्ही फुटेज, तांत्रिक तपास आणि गुप्त बातमीदारांच्या मदतीने संशयितांचा माग काढला.
तपासात आरोपींची ओळख पटून पथकाने थेरगाव स्मशानभूमीजवळून यश रमेश अंधारे (18), रितेश मुकेश चव्हाण (18), रुपेंद्र रुपबसंत बैद (19) आणि एका विधी संघर्षित बालकाला ताब्यात घेतले. चौकशीत त्यांनी गुन्ह्याची कबुली दिली आहे.
अटक आरोपींना न्यायालयीन कार्यवाहीसाठी चिंचवड पोलीस ठाण्यात हजर केले असून पुढील तपास सुरू आहे.
