पुणे: पुण्यात बिबट्यामुळे भीतीचे वातावरण आहे. गेल्या आठवड्यात औंधमध्ये दिसलेला बिबट्या आता बावधन भागात पोहोचला आहे. परिसरातील रहिवाशांनी बिबट्या पाहिला आणि लगेचच झाडीकडे पळणाऱ्या बिबट्याचा व्हिडीओ काढला. बावधन परिसरातील नागरिकांनी तात्काळ या घटनेची माहिती वन विभागाला दिली.
नॅशनल सोसायटीच्या मार्गाने बिबट्या बावधन टेकडीच्या दिशेने आला असावा अशी शक्यता व्यक्त केली जात आहे. वन विभागाच्या पाहणीत राम नदी किनारी बिबट्याच्या पाऊलखुणा परिसरात दिसून आल्याने नागरिकांत भीतीचे वातावरण आहे. बावधनमधील टेकड्यांवर घनदाट जंगल असल्याने तज्ज्ञांचा असा अंदाज आहे की, या सुमारे 500 एकर वनक्षेत्रात बिबट्याचे कायमस्वरूपी वास्तव्य आहे.
बावधन, औंध, पाषाण येथे बिबट्याच्या वारंवार होणाऱ्या दर्शनामुळे रहिवाशांना सतर्क राहण्याचे आवाहन करण्यात आले आहे. बिबट्या गेल्या आठ दिवसांपासून बावधन परिसरात लपून बसलेला होता, तो रात्री बाहेर पडत होता. दरम्यान, बिबट्याला पकडण्यासाठी वन विभागाचे पथक आणि रेस्क्यू टीमने आता या भागात ट्रॅप कॅमेरे लावले असून बिबट्याला पकडण्यासाठी वन विभागाकडून सर्व प्रयत्न केले जात आहेत.
