पुणे: पीएमपी प्रशासनाने बस चालक, वाहक (Pune News) तसेच इतर कर्मचाऱ्यांवर शिस्तभंगाची कडक कारवाई सुरू केली आहे. बस चालवताना किंवा आगार परिसरात तंबाखू, गुटखा खाणे आणि सार्वजनिक ठिकाणी थुंकणे या प्रकारांमुळे पीएमपीची प्रतिमा खराब होत असल्याचे प्रशासनाच्या निदर्शनास आले होते. नागरिकांकडून वारंवार तक्रारी प्राप्त झाल्यानंतर पीएमपीचे अध्यक्ष व व्यवस्थापकीय संचालक पंकज देवरे यांनी या बाबीची गंभीर दखल घेतली आहे. (Pune PMP News)
पुणे, पिंपरी-चिंचवड आणि पीएमआरडीए परिसरात पीएमपीकडून बस सेवा चालवली जाते. या सेवेदरम्यान काही चालक आणि वाहक कामावर असताना तंबाखूजन्य पदार्थांचे सेवन करत असून रस्त्यावर थुंकत असल्याच्या तक्रारी नागरिकांनी केल्या होत्या. यामध्ये बस चालवताना तंबाखू किंवा गुटखा खाणे, प्रवाशांसमोर अस्वच्छ वर्तन करणे आणि सार्वजनिक आरोग्याला धोका निर्माण होईल असे प्रकार सुरू असल्याचे निदर्शनास आले.
या पार्श्वभूमीवर पीएमपी प्रशासनाने स्पष्ट सूचना दिल्या आहेत. बस चालक आणि वाहकांनी कामाच्या वेळेत कोणत्याही प्रकारचे तंबाखूजन्य पदार्थ खाऊ नयेत. सार्वजनिक ठिकाणी किंवा रस्त्यावर थुंकू नये. प्रवाशांच्या आरोग्यास हानी पोहचेल असे कोणतेही वर्तन करू नये. पीएमपीची प्रतिमा खराब होईल असे कृत्य टाळावे. आगार आणि बसस्थानक परिसर स्वच्छ ठेवावा, अशा सूचनांचा समावेश करण्यात आला आहे.
या सूचना केवळ चालक आणि वाहकांपुरत्या मर्यादित नसून टाइमकिपर, गॅरेज सुपरवायझर, कंट्रोलर, चेकर आणि आगार व्यवस्थापकांनाही लागू आहेत. या सूचनांचे उल्लंघन करणाऱ्या कोणत्याही कर्मचाऱ्यावर 1000 रुपयांचा दंड आकारण्यात येणार आहे. गंभीर प्रकारांमध्ये निलंबनाची कारवाईही होऊ शकते, असे प्रशासनाने स्पष्ट केले आहे.
तसेच आगार व्यवस्थापकांनी आपल्या कर्मचाऱ्यांमध्ये स्वच्छतेबाबत जनजागृती आणि प्रबोधन करावे, असे निर्देश पंकज देवरे यांनी दिले आहेत. पीएमपीची प्रतिमा चांगली राखण्यासाठी आणि प्रवाशांना सुरक्षित व स्वच्छ सेवा देण्यासाठी ही कारवाई महत्त्वाची मानली जात आहे.
