पुणे : गणेशोत्सवाच्या काळात पुण्यातील भाविकांचा प्रवास अधिक वेगवान, सुरक्षित आणि सोयीस्कर व्हावा यासाठी पुणे मेट्रो प्रशासनाने विशेष नियोजन केले आहे. या काळात होणारी संभाव्य गर्दी लक्षात घेऊन मेट्रोच्या वेळा वाढवण्यात आल्या असून, गर्दीच्या वेळेत दर 5 मिनिटांनी मेट्रो गाड्या उपलब्ध असतील.
मेट्रोच्या वेळापत्रकातील बदल
14 ते 16 सप्टेंबर (गणेश चतुर्थी ते बुधवार): सकाळी 6:00 ते रात्री 11:00 या नियमित वेळेत मेट्रो धावेल.
17 ते 24 सप्टेंबर (गौरी पूजन आणि पुढील दिवस): भाविकांच्या सोयीसाठी मेट्रो सकाळी 6:00 ते मध्यरात्री 2:00 वाजेपर्यंत सुरू राहील.
25 ते 26 सप्टेंबर (अनंत चतुर्दशी): उत्सवाच्या मुख्य दिवशी 25 सप्टेंबर रोजी सकाळी 6:00 वाजल्यापासून ते सलग 26 सप्टेंबरच्या रात्री 11:00 वाजेपर्यंत (एकूण 41 तास) मेट्रो अखंडपणे धावेल.
27 सप्टेंबरपासून: मेट्रोची सेवा पूर्ववत होऊन नेहमीप्रमाणे सकाळी 6:00 ते रात्री 11:00 अशी सुरू राहील.
मध्यवर्ती पुण्यातील पेठ भागात गणपती दर्शनासाठी जाणाऱ्या प्रवाशांसाठी स्थानकांची विशेष वाटप व्यवस्था करण्यात आली आहे:
त्यानुसार मार्गिका 1 वरील प्रवाशांनी: कसबा पेठ स्थानकावर उतरावे.मार्गिका 2 वरील प्रवाशांनी: वनाजकडून येणाऱ्यांनी डेक्कन जिमखाना स्थानकाचा, तर रामवाडीकडून येणाऱ्यांनी PMC (पुणे महानगरपालिका) स्थानकाचा वापर करावा.
महात्मा फुले मंडई स्थानक: दर्शनासाठी येथे उतरून गर्दी करणे टाळावे; हे स्थानक मुख्यत्वे फक्त परतीच्या प्रवासासाठी वापरावे. 14 ते 26 सप्टेंबर या कालावधीत हे स्थानक ‘एकदिशात्मक’असेल. लोकमान्य टिळक पुतळ्याकडील प्रवेशद्वार क्र. 3 फक्त आत जाण्यासाठी, तर छत्रपती शिवाजी महाराज रस्त्यावरील द्वार क्र. 2 फक्त बाहेर पडण्यासाठी खुले राहील.
याशिवाय, जिल्हा न्यायालय स्थानकात मार्ग बदलावा.नागरिकांनी आपापल्या मार्गावरील नमूद स्थानकांचा वापर करून सहकार्य करावे, असे आवाहन प्रशासनाने केले आहे.
