पुणे: लोकसभेत केंद्रीय रस्ते वाहतूक आणि महामार्ग मंत्री नितीन गडकरी (Pune-Kolhapur Highway) यांनी पुणे-कोल्हापूर महामार्गाबाबत (Nitin Gadakari) महत्त्वाची घोषणा केली आहे. या महामार्गाच्या सुधारणा आणि विस्तारासाठी सुमारे 6000 कोटी रुपयांचा सविस्तर प्रकल्प अहवाल तयार करण्यात आला असून, लवकरच या प्रकल्पाची अंमलबजावणी सुरू होणार असल्याचे त्यांनी स्पष्ट केले. (Pune News)
हिवाळी अधिवेशनात बारामतीच्या खासदार सुप्रिया सुळे यांनी विचारलेल्या प्रश्नाला उत्तर देताना गडकरी म्हणाले की, मंत्रालय डीपीआर अंमलात आणण्यासाठी पूर्णपणे तयार आहे. या प्रकल्पांतर्गत पुणे ते सातारा आणि पुढे कोल्हापूरपर्यंतच्या महामार्गावर मोठ्या प्रमाणावर सुधारणा करण्यात येणार आहेत. विशेषतः खंबाटकी घाट परिसरात दोन नवीन बोगदे तयार करण्यात येत असून, यापैकी एका बोगद्याचे उद्घाटन लवकरच करण्यात येणार आहे.
गडकरी यांनी या महामार्गाचे धोरणात्मक महत्त्व अधोरेखित केले. पश्चिम बायपासवरील सेवा रस्त्यांच्या कामासाठी निधी उपलब्ध करून देण्यात आला असून, सातारा ते कोल्हापूर दरम्यानच्या कामांना आधीच मंजुरी देण्यात आल्याचे त्यांनी सांगितले. प्रकल्पाच्या प्रगतीचा आढावा घेण्यासाठी आणि खासदारांनी दिलेल्या सूचनांवर चर्चा करण्यासाठी पुढील आठवड्यात मंत्रालयात बैठक घेण्यात येणार आहे.
पुणे ते बेंगळुरू मार्गावर प्रवास करणाऱ्या वाहनचालकांचे हाल कमी करण्यासाठी महामार्गाच्या पृष्ठभागाची दुरुस्ती, काँक्रिटीकरण आणि इतर सुधारणा कामे एका वर्षात पूर्ण करण्याचे उद्दिष्ट असल्याचेही गडकरी यांनी स्पष्ट केले.
दरम्यान, सुप्रिया सुळे यांनी या प्रकल्पात होत असलेल्या विलंबावर नाराजी व्यक्त केली. काही कंत्राटदारांना काळ्या यादीत टाकण्यात आले असताना कामाला वारंवार उशीर का होत आहे, असा सवाल त्यांनी केला. नवले पूल परिसर, कात्रज, शिंदेवाडी, खेड शिवापूर आणि कापूरहोळ येथे होणारी वाहतूक कोंडी आणि वाढते अपघात याकडेही त्यांनी लक्ष वेधले. रात्रीच्या वेळेस परिस्थिती अधिक गंभीर होत असल्याच्या तक्रारी स्थानिक नागरिकांकडून होत आहेत. अशा पार्श्वभूमीवर गडकरी यांनी पुणे-कोल्हापूर महामार्गाचे काम एका वर्षात पूर्ण केले जाईल, असा दावा केला आहे.
