पुणे: ‘नीट’ परीक्षेतील पेपरफुटीचे प्रकरण आणि ज्येष्ठ सामाजिक कार्यकर्ते सोनम वांगचुक यांच्यावर झालेल्या कारवाईच्या निषेधार्थ पुण्यात नागरिकांनी आक्रमक पवित्रा घेतला.शिक्षण व्यवस्थेतील गोंधळामुळे विद्यार्थ्यांचे भविष्य टांगणीला लागल्याची भावना यावेळी नागरिकांनी व्यक्त केली.
शांततापूर्ण मार्गाने झालेल्या या आंदोलनात नागरिकांनी फलक, मीम्स, गाणी आणि घोषणांच्या माध्यमातून आपला संताप व्यक्त केला. “तानाशाही नही चलेगी”, “भारत माता की जय” आणि “इन्कलाब जिंदाबाद” अशा घोषणांनी परिसर दुमदुमून गेला होता. मध्यमवर्गीय नागरिकांसह तरुणाईचा या निदर्शनांमध्ये मोठा सहभाग होता.
या आंदोलनात स्टुडंट्स फेडरेशन ऑफ इंडिया (SFI), भारत जोडो अभियान, राष्ट्र सेवा दल, समाजवादी पार्टी, जनआंदोलनांचा राष्ट्रीय समन्वय आणि अखिल भारतीय समाजवादी शिक्षण हक्क सभा यांसारख्या अनेक संघटनांचे प्रतिनिधी सहभागी झाले होते. पुण्यातील विविध महाविद्यालयांतील विद्यार्थ्यांनी उपस्थित राहून प्रशासनाच्या ढिसाळ कारभारावर कडक शब्दांत टीका केली.
सरकारच्या उदासीन धोरणामुळे विद्यार्थ्यांचा व्यवस्थेवरील विश्वास उडाला असून आता हा जनआक्रोश निर्माण झाला आहे, असा इशारा आंदोलकांनी दिला.
