Pune Crime: पुणे : बाणेर–बालेवाडी फाटा परिसरात घडलेल्या अपघात प्रकरणात ज्येष्ठ नागरिकाला जखमी अवस्थेत टाकून पलायन केलेल्या रिक्षा चालकाला अटक करण्यात आले आहे. अखेर 5 महिन्यांच्या शोध मोहिमेनंतर बाणेर पोलिसांनी आरोपीला दिल्लीतून अटक केली आहे. या अपघातात जखमी झालेल्या ज्येष्ठ नागरिकाचा वेळेत उपचार न मिळाल्याने मृत्यू झाला होता. Pune Crime
मिळालेल्या माहितीनुसार, अटक केलेल्या आरोपीचे नाव इस्रायल मंगला गुर्जर (वय 23, रा. नावनेर, अमरोहा, उत्तर प्रदेश) असे आहे. दिल्ली न्यायालयाकडून ट्रान्झिट रिमांड मिळवून त्याला पुण्यात आणण्यात आले. पुणे न्यायालयाने त्याला 12 डिसेंबर पर्यंत पोलीस कोठडी सुनावली असल्याची माहिती समोर येत आहे.
नेमकं काय घडलं?
ही घटना २० जुलै रोजी सायंकाळी घडली. गोपाळ गोविंद वाघ (वय 63, रा. बालेवाडी) हे न्यू पूना बेकरीसमोर असलेला रस्ता ओलांडत होते. त्यावेळी अचानक एका रिक्षाने धडक दिली. या अपघातात त्यांच्या डोक्याला गंभीर दुखापत झाली. रुग्णालयात नेण्याचे सांगत गुर्जरने वाघ यांना रिक्षात बसविले; मात्र काही अंतरावर रेंज हिल्स परिसरात, रेल्वे रुळाजवळील गवतात त्यांना जखमी अवस्थेत टाकून पळून गेला. वेळेत उपचार न मिळाल्याने वाघ यांचा मृत्यू झाला.
बाणेर पोलीस ठाण्यात या प्रकरणी गुन्हा दाखल करण्यात आला. सीसीटीव्ही तपासात अपघातस्थळी दिसलेली रिक्षा सांगवी परिसरात सापडली. रिक्षा मालकाच्या चौकशीत आरोपीचे नाव व मोबाइल क्रमांक मिळाला, परंतु गुर्जर उत्तर प्रदेशात पळून गेल्याने त्याचा शोध घेणे अवघड झाले. दिल्लीत त्याने नवीन फोन आणि सीमाकार्ड घेतल्यानंतर ही घटना आणखी गुंतून गेली.
दरम्यान, त्याने वडिलांना दुसऱ्या क्रमांकावरून संपर्क साधल्याची माहिती तांत्रिक तपासातून मिळाली. त्यावरून पुणे पोलिसांनी त्याचा शोध सुरु केला आणि तो दिल्लीमध्ये असल्याचे समजताच बाणेर पोलिसांनी पथक पाठवून त्याला अटक केली.
