पुणे: पुण्यातील कॅम्प परिसरातून एक खळबळजनक घटना समोर आली आहे. डॉक्टरकडे लवकर नंबर लावण्यासाठी एका तरुणीने पोलीस उपनिरीक्षक असल्याचे खोटे नाटक केले, मात्र तिच्या गणवेशातील एका लहान चुकीमुळे तिचा हा बनाव उघड झाला आणि तिला अटक करण्यात आली. ही घटना लष्कर पोलीस ठाण्याच्या हद्दीत घडली असून, या प्रकारामुळे सर्वत्र चर्चा सुरू आहे.
समोर आलेल्या माहितीनुसार, समिना आफिस इनामदार असे या 26 वर्षांच्या तरुणीचे नाव आहे. 6 जून रोजी सकाळी 10 च्या सुमारास ती पोलीस गणवेश परिधान करून शहरातील एका स्किन क्लिनिकमध्ये पोहोचली. रात्रपाळीची ड्युटी करून थकल्याचे भासवून तिने डॉक्टरांकडे प्राधान्याने उपचार करण्याची मागणी केली.
मात्र, सुदैवाने तिथे लष्कर पोलीस ठाण्यातील सहाय्यक पोलीस फौजदार महेश शिंदे उपस्थित होते. त्यांनी जेव्हा तिला पहिले, तेव्हा त्यांना काहीतरी संशयास्पद वाटले. पोलीस नियमानुसार नावाची पाटी उजव्या बाजूला असणे बंधनकारक असते, मात्र समिनाने ती चुकून डाव्या बाजूला लावली होती.
फौजदार शिंदे यांनी तिला विचारले की, ती कोणत्या पोलीस ठाण्यात कार्यरत आहे. तिने बाणेर पोलीस ठाण्याचे नाव घेतले, परंतु तिच्या बोलण्यातील विसंगतीमुळे पोलिसांचा संशय अधिकच बळावला. त्यांनी तात्काळ महिला पोलिसांना बोलावून घेतले आणि कसून चौकशी केली. या चौकशीत तिने आपण पोलीस नसल्याचे कबूल केले.
तपासात अशी माहिती समोर आली की, समिना केवळ 12 वी उत्तीर्ण असून तिला पोलीस दलात भरती होण्याची मनापासून इच्छा होती. खाकी वर्दीचे आकर्षण आणि दवाखान्यात रुग्णांची गर्दी टाळून लवकर नंबर मिळवण्यासाठी तिने हा भन्नाट मार्ग निवडला होता. सध्या लष्कर पोलिसांनी तिच्यावर तोतयागिरी आणि फसवणुकीचा गुन्हा दाखल केला आहे. तिने यापूर्वी अशा प्रकारे कोणाची फसवणूक केली आहे का, याचा तपास आता पोलीस करत आहेत.
