पुणे : हिंदवी स्वराज्याची राजधानी किल्ले रायगडावरील छत्रपती शिवाजी महाराजांच्या समाधीसमोर असलेल्या वाघ्या कुत्र्याच्या स्मारकावरून वाद सुरु आहे.अशातच आता भाजपचे आमदार गोपीचंद पडळकर यांनी या वादात उडी घेतली आहे. किल्ले रायगडावर असलेल्या वाघ्या कुत्र्याच्या स्मारकाजववळ आणखी 10 ते 12 पोलिसांचा बंदोबस्त वाढवण्यात यावा, अशी मागणीच गोपीचंद पडळकर यांनी केली आहे.
रायगड प्राधिकरण समितीचे अध्यक्ष आणि छत्रपती घराण्याचे वंशज संभाजीराजे छत्रपती यांनी वाघ्या कुत्र्याची समाधी हटवण्याची मागणी केली आहे. त्यानंतर या वादात शिवप्रतिष्ठानचे प्रमुख संभाजी भिडे गुरुजी यांनी उडी घेत वाघ्या कुत्र्याच्या समाधीची कथा सांगितली. त्यानंतर आता भाजप आमदार गोपीचंद पडळकर यांनी वाघ्या श्वानाच्या स्मारकाजवळ दहा ते बारा पोलिसांचा बंदोबस्त वाढवावा अशी मागणी केली आहे.याबाबत पुढे बोलताना ते म्हणाले, उदयनराजे भोसलेंबद्दल माझ्या मनात नितांत आदर आहे. पण नेता जेव्हा अडचणीत येतो किंवा सत्ता जाते तेव्हा असे मुद्दे शोधून काढले जातात.
दरम्यान पुढे बोलताना गोपीचंद पडळकर यांनी वाघ्याच्या स्मारकाचा मुद्दाही ब्रिगेडींनी काढला आहे, असं सांगितलं. तसेच यावेळी त्यांनी शरद पवार यांच्यावरही टीकास्त्र सोडलं. शरद पवार यांना माझी एक विनंती आहे. पवारांनी त्यांचा पक्ष अजित पवारांकडे दिला आहे. आता शरद पवार यांच्याकडे फावला वेळ आहे. त्यामुळे त्यांनी या दोन वर्षात त्यांना पाहिजे तसा इतिहास लिहावा, असा खोचक टोलाही पडळकर यांनी लगावला आहे.
