Onion Rate : राज्यातील कांदा उत्पादक शेतकऱ्यांना दर घसरणीचा फटका बसत असून लासलगावसारख्या प्रमुख बाजारात कांद्याला 8 ते 12 रुपये प्रति किलो दर मिळत आहे. नव्याने बाजारात दाखल होत असलेल्या उन्हाळी कांद्याच्या वाढत्या पुरवठ्यामुळे ही घसरण नोंदवली जात आहे.
कांद्याच्या दर घसरणीमागे निर्यातीतील घट आणि जागतिक परिस्थितीचा परिणाम दिसत आहे. अमेरिका, इस्रायल आणि इराण यांच्यातील तणावामुळे आखाती देशांमधील मागणी कमी झाली आहे. यामुळे व्यापाऱ्यांकडे मोठा साठा शिल्लक राहिला आहे. तसेच कंटेनर भाड्यात वाढ झाल्याने निर्यात खर्च मोठ्या प्रमाणात वाढला आहे. बाजारात नवीन उन्हाळी कांद्याचा पुरवठा वाढला असून पश्चिम बंगाल, मध्य प्रदेश आणि राजस्थानमधील कांदा कमी दरात उपलब्ध असल्याने स्थानिक कांद्याला मागणी कमी झाली आहे.
नाफेड आणि एनसीसीएफ यांच्या खरेदीचे उद्दिष्ट 5 लाख मॅट्रिक टनांवरून 2 लाख मॅट्रिक टनांपर्यंत कमी करण्यात आले आहे. त्यामुळे बाजारातील अतिरिक्त साठा कमी करण्यास अडचणी येत आहेत.
वाशी एपीएमसी मार्केट येथे घाऊक दर 8 ते 12 रुपये प्रति किलो दरम्यान नोंदवले गेले. मागील दोन महिन्यांतील 12 ते 15 रुपयांच्या सरासरी दराच्या तुलनेत ही घसरण आहे. घाऊक बाजारात दर कमी असताना किरकोळ बाजारात मुंबईमध्ये कांदा 20 ते 24 रुपये प्रति किलो दराने विक्री होत आहे.
